U Biełaaziersku školnik sarvaŭsia z bałkona piataha paviercha
02.08.2016 / 18:29
Śledčyja Biarozaŭskaha rajona vyśviatlajuć abstaviny hibieli 12-hadovaha chłopčyka, jaki vypaŭ z bałkona šmatpaviarchovaha doma ŭ horadzie Biełaaziersku, paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova.
Z vyšyni piataha pavierchu školnik sarvaŭsia ŭviečary 1 žniŭnia. Chłopčyk vyrašyŭ pahulać z drotam dla suški bializny. Jon pavis na im, ale drot abarvaŭsia, nie vytrymaŭšy takoj vahi. Chłopčyk zahinuŭ na miescy. U momant zdareńnia ŭ kvatery razam ź dziciem znachodzilisia jaho maci i dźvie małodšyja siastry.
Na miescy zdareńnia pracavali śledča-apieratyŭnaja hrupa sumiesna sa śpiecyjalistami Dziaržaŭnaha kamiteta sudovych ekśpiertyz. Pa ich papiaredniaj viersii, padzieńnie chłopčyka adbyłosia pa nieaściarožnaści.
Biarozaŭski rajonny adździeł Śledčaha kamiteta pa fakcie śmierci dziciaci pravodzić pravierku. Vyśviatlajucca ŭsie abstaviny zdareńnia. Dla daśledavańnia kanfiskavanyja mabilny telefon i noŭtbuk dziciaci. Taksama apytanyja vidavočcy i rodnyja zahinułaha, pryznačana sudova-miedycynskaja ekśpiertyza. Siamja chłopčyka charaktaryzujecca stanoŭča, na prafiłaktyčnych ulikach nie była. Hetym letam dzicia skončyła 6 kłas u Biełaazierskaj himnazii.