Крымінальныя разборкі пад Львовам: падарванае аўто, трое загінулых
29.08.2016 / 16:26
У Пустамытаўскам раёне Львоўскай вобласці невядомыя абстралялі і ўзарвалі аўтамабіль, у выніку чаго загінулі тры чалавекі.
Пра гэта распавёў дырэктар дэпартамента камунікацый МУС Украіны Арцём Шаўчэнка.
«Быў падрыў і быў абстрэл з аўтаматычнай зброі аўтамабіля, у выніку якога загінулі тры чалавекі, адзін быў паранены. Аўтамабіль належаў ААТ «Львоўскі холадакамбінат», — сказаў ён.
Паводле яго слоў, асобы траіх загінулых высвятляюцца.
«Папярэдне, гэта ахоўнікі кіраўніка і ўладальніка гэтага камбіната, які з'яўляецца асобай даволі вядомай у вузкіх крымінальных колах Львоўшчыны», — сказаў Шаўчэнка.
Ён таксама паведаміў, што па версіі паліцыі гаворка ідзе пра «крымінальную барацьбу за ўплыў паміж арганізаванымі злачыннымі групамі ў рэгіёне».
Са слоў спадара Шаўчэнкі, на месца выехаў начальнік крымінальнай паліцыі Вадзім Траян.