CAS skaraciŭ termin dyskvalifikacyi Maryi Šarapavaj
04.10.2016 / 21:14
Mižnarodny spartyŭny arbitražny sud u Łazanie (CAS) skaraciŭ termin dyskvalifikacyi rasijskaj tenisistki Maryi Šarapavaj, jakaja raniej była adchilena na dva hady za ŭžyvańnie mieldoniju. Pra heta havorycca ŭ aficyjnaj zajavie suda.
Eks-pieršaja rakietka śvietu atrymała dyskvalifikacyju za parušeńnie antydopinhavych pravił. Pakarańnie adličvałasia z 26 studzienia 2016 hoda. Spartsmienka ŭ červieni nakiravała ŭ spartyŭny arbitražny sud apielacyju na rašeńnie ab svaim adchileńni. «Termin dyskvalifikacyi skaročany da 15 miesiacaŭ. Maryja Šarapava z 26 krasavika 2017 hoda zmoža prymać udzieł va ŭsich aficyjnych turnirach Suśvietnaj žanočaj tenisnaj asacyjacyi (WTA)», — havorycca ŭ zajavie.
Mienavita z zajavy Maryi Šarapavaj ab užyvańni mieldoniju ŭ sakaviku biahučaha hoda pačałasia znakamitaja sprava ab hetym preparacie, pad padazreńnie trapili mnohija atlety, što prymusiła Suśvietnaje antydopinhavaje ahienctva (WADA) pierahledzieć miery pakarańnia pa preparacie mieldonij. Poŭnaja zabarona na jaho ŭžyvańnie ŭstupiła ŭ siłu z 1 kastryčnika 2016 hoda.
Maryja Šarapava prapuściła Alimpijadu ŭ Rya-de-Žanejra, ale rasijskija spartyŭnyja čynoŭniki ŭžo zajavili, što viadučaja tenisistka budzie rychtavacca da Tokia-2020. Na praviedzienych Hulniach u Brazilii z-za dyskvalifikacyi z boku Mižnarodnaj fiederacyi kanoe (ICF) nie zmahła pryniać udzieł mužčynskaja zbornaja Biełarusi pa viesłavańni na bajdarkach i kanoe, jakaja pretendavała adrazu na niekalki ŭznaharod na startach u žniŭni. U lipieni biełaruskim bokam byŭ padadzieny isk da ICF. Jak zajaviŭ siońnia hienieralny sakratar NAK Biełarusi Anatol Kotaŭ, słuchańnie pa hetaj spravie aryjencirovačna adbudziecca ŭ pačatku listapada.