Śledstva pa spravie Šaramieta ŭziało śled u dobraachvotnickija bataljony
30.10.2016 / 15:27
Śledstva vyznačyła dom, u jakim siadzieŭ kiler, jaki pryvioŭ u dziejańnie vybuchovuju pryładu pad mašynaj Šaramieta. Heta dom numar 17 na vulicy Ivana Franko ŭ Kijevie, pišuć ukrainskija ŚMI.
Złačyncu — ci złačyncam — było lohka chavacca ŭ rekanstrujavanym, niežyłym budynku.
Što da padazravanych, to takich pakul niama. Ale stała viadoma, što śledstva zacikaviłasia šeraham telefonnych numaroŭ, jakija adnačasova i niadoŭhačasova pracavali ŭ zonie miesca pražyvańnia i parkoŭki Paŭła Šaramieta
28 lipienia ŭ Piačerski rajsud Kijeva pastupiła chadajnictva śledčych ab dostupie da infarmacyi 10 kankretnych numaroŭ mabilnaj suviazi.
«[Telefonnyja numary] byli aktyŭnyja ŭ 2016/07/20 i źmianili terminały (IMIEI) u adzin čas 2016/07/19», - havorycca ŭ abhruntavańni rašeńnia.
«Pry praviadzieńni analizu złučeńniaŭ ASOBA_4 ŭstanoŭlena, što pra abstaviny zabojstva mohuć być viadomyja ŭładalnikam abanienckich numaroŭ NUMAR_3, NUMAR_4 i NUMAR_5, ź jakimi ASOBA_4 mieła znosiny 2016/07/20 niepasredna paśla jaho ździajśnieńnia», — havorycca ŭ tłumačeńniach palicyi.
16 žniŭnia śledčy hrupy śledčych HSU Nacyjanalnaj palicyi Andžej Padalak padaŭ u Piačerski rajsud šerah chadajnictvaŭ z prośbaj ab čarhovym dostupie da dadzienych niekalkich mabilnych numaroŭ.
U dakumientach havorycca ab vyznačeńni kaardynataŭ bazavych stancyj apierataraŭ mabilnaj suviazi «Kijevstar», «MTS», Lifecell, jakija fiksavali rehistracyi abanientaŭ, jakija mohuć być datyčnyja da zabojstva Šaramieta, pa adrasach:
— Danieckaja vobłaść, Manhušski rajon, v. Jurjeŭka,
— Danieckaja vobłaść, Manhušski rajon, Urzuf,
— Danieckaja vobłaść, Maryupal, praśpiekt Nachimava.
Śledčyja prasili sud dazvolić manitorynh abanientaŭ u hetych miascovaściach ŭ roznyja pieryjady času.
Vyšejpakazanyja adrasy supadajuć z punktami dysłakacyi bataljona «Azoŭ», piša «Ukrainskaja praŭda» — vydańnie, jakoje naležyć siabroŭcy Šaramieta, Alenie Prytule.
Vydańnie adznačaje, što z bajcami hetaha bataljona ŭ Paŭła Šaramieta byli dobryja i navat siabroŭskija adnosiny.
Akramia taho, u sud prychodziła jašče adno chadajnictva ab dostupie da 41 numara sotavaj suviazi.
U abhruntavańni śledčych havorycca, što hetyja numary naležać asobam, jakija majuć dačynieńnie da dobraachvotnickich bataljonaŭ i mohuć być datyčnymi da zabojstva.
Paviedamlajecca, što pakul zaŭčasna havaryć pra datyčnaść tych ci inšych asobaŭ ci bataljonaŭ da złačynstva. Sprava zanadta składanaja, kab zrabić vysnovy, a zabojcy mahli zakłaści nitački, jakija padvodzić da pamyłkovych śladoŭ.