Muzyka dla chvoraha serca
Siamja Łarynych bolš za try hady žyvie ŭ stanie šoku. Absalutna zdarovyja chłopčyki‑bliźniuki na 20‑m hodzie žyćcia zachvareli. Ich maci dumała spačatku, što heta zvyčajnaja prastuda, ale praź niekatory čas medyki pastavili žachlivy dyjahnaz.
24.06.2008 / 18:05
Ich maci Volha Uładzimiraŭna padumała spačatku, što heta zvyčajnaja prastuda, ale praź niekatory čas miedyki pastavili žachlivy dyjahnaz:
‑ Niedzie ź intervałam u dva tydni stała kiepska adnamu i druhomu. Žalilisia na boli ŭ hrudziach. Ale što moža niepakoić 20‑hadovaha chłopca? Viadoma ž, dumali, što prastyŭ. Zrabili flurahrafiju — usio narmalna. Ale potym zrabili kardyjahramu i terminova pakłali ŭ pieršuju kliniku, dzie pastavili hety strašny dyjahnaz.
Adzin z chłopcaŭ — Saša — pajšoŭ u inšy śviet praz try miesiacy. Maci kaža, što jon litaralna zhareŭ na vačach. Michasiu zrabili apieracyju, ale jana nie dapamahła. Prafiesar i adzin ź lepšych u Biełarusi kardyjachirurhaŭ Juryj Astroŭski sa skruchaju vymaŭlaje hety dyjahnaz i kaža, što pryčyny hetaha zachvorvańnia zastajucca dla miedykaŭ nieviadomymi.
‑ Heta dylitacyjnaja kardyjamijapatyja. Zachvorvańnie źviazana ź nieviadomaj dahetul pryčynaj, jakaja vyklikaje paražeńnie sardečnaj myšcy — i jana nie zdolnaja dastatkova aktyŭna skaračacca, kab padtrymlivać kryvazvarot u arhaniźmie. Adzinym radykalnym sposabam lačeńnia źjaŭlajecca transpłantacyja serca abo padłučeńnie inžyniernych sistemaŭ, što zdolnyja zamiaścić serca.
Michaś užo paŭhoda nie vychodzić na vulicu — jon padłučany da aparatu štučnaha serca. Heta ahrehat, jaki źniešnie nahadvaje bankamat i važyć 300 kiłahramaŭ. Jury Astroŭski kanstatuje — biez hetaj sistemy chłopiec nie moža žyć, ale aparat moža tolki padtrymlivać žyćcio
Adzinaje vyjście ŭ hetaj situacyi — apieracyja pa pierasadcy serca, jakaja robicca tolki za miažoj i kaštuje 350 tysiačaŭ jeŭra. Dzie ŭziać takija hrošy baćki Mišy Łaryna nie viedajuć — maci pracuje zaŭhasam, baćka — vachcioram. U Volhi Uładzimiraŭny jość adzin spadzieŭ — što dapamohuć nieabyjakavyja ludzi:
‑ Miša choča žyć. Vielmi choča žyć. Tamu źviartajusia da ŭsich dobrych ludziej — kali možacie dapamažycie ŭratavać dzicionka! Bo heta niemahčyma… Adzin, ciapier druhi. Heta vielmi strašna.
Na prośbu siamji Łarynych užo adhuknulisia šerah viadomych biełaruskich muzykaŭ. Adzin ź ich — Uładzimir Puhač z hurta «J:Mors». Na jaho dumku, u siońniašnim śviecie, pieranasyčanym infarmacyjaj, sapraŭdy ciažka dakryčacca da ludziej. Ale artysty, prynamsi, u zmozie źviarnuć uvahu na peŭnuju prablemu. Tamu hurt «J:Mors» adzin ź pieršych dałučyŭsia da akcyi «Serca žyvie».
‑ Sutnaść akcyi palahaje ŭ tym, što biełaruskija artysty buduć pryciahvać uvahu da hetaj prablemy. Dziela hetaha stvorany sajt «Serca žyvie», dzie jak minimum ciaham usiaho leta buduć vykładacca ekśluziŭnyja muzyčnyja treki. Prosim naŭzamien pra adzinaje — dapamahčy Michasiu.
Admysłovy sajt Serca žyvie zapracavaŭ z 24 červienia.
Akramia «J:Mors», u akcyi voźmuć udzieł hurty N.R.M., «Krambambula», «Lapis Trubiackoj», a taksama šerah pradstaŭnikoŭ papularnaj muzyki. Mienavita pa hetym adrasie možna budzie absalutna biaspłatna spampavać treki hetych artystaŭ i daznacca, jak dapamahčy chłopcu, jaki tak prahnie žyć.