Vosiem hadoŭ tamu źnik Źmicier Zavadzki
Siońnia spaŭniajecca vosiem hadoŭ z momantu źniknieńnia aperatara rasiejskaha telekanału ORT (ciapier — «Piervyj kanał») Źmitra Zavadzkaha.
07.07.2008 / 13:09
Źmicier Zavadzki |
Siońnia spaŭniajecca vosiem hadoŭ z momantu źniknieńnia aperatara rasiejskaha telekanału ORT (ciapier — «Piervyj kanał») Źmitra Zavadzkaha.
7 lipienia 2000 hodu Zavadzki, jaki ŭ svoj čas pracavaŭ asabistym aperataram prezydenta Biełarusi, adpraviŭsia ŭ Nacyjanalny aeraport «Minsk» sustrakać svajho kalehu — žurnalista ORT Paŭła Šaramieta. Z taho času Zavadzkaha nichto nie bačyŭ. Jaho aŭtamabil byŭ znojdzieny ŭ aeraporcie.
U 2002 hodzie Mienski abłasny sud pryznaŭ vinavataj vykradańni Zavadzkaha hrupu byłoha bajca specpadraździaleńnia MUS «Ałmaz» Valeryja Ihnatoviča i pryhavaryŭ dvuch čałaviek da pažyćciovaha źniavoleńnia. U sakaviku 2004 hodu respublikanskaja prakuratura prypyniła raśśledavańnie spravy ab vykradańni Zavadzkaha «ŭ suviazi ź nieadšukańniem biaź viestak źnikłaj asoby». U 2005 hodzie raśśledavańnie było adnoŭlena.
Na pres‑kanferencyi 25 červienia hetaha hodu hieneralny prakuror Biełarusi Ryhor Vasilevič zajaviŭ, što sytuacyja sa spravami ab «hučnych źniknieńniach» znachodzicca na kantroli ŭ prakuratury. U pryvatnaści, adkazvajučy na pytańnie ab tym, jak prasoŭvajecca śledztva pa spravach ab źniknieńni Źmitra Zavadzkaha, biznesmena Anatola Krasoŭskaha, byłoha ministra ŭnutranych spraŭ Juryja Zacharanki i palityka Viktara Hančara, sp. Vasilevič skazaŭ:
«Pytańnie ab vyšuku źnikłych biaź viestak — adno z hałoŭnych dla nas. My jaho razhladali na mižviedamasnaj kamisii j vierniemsia da jaho ŭ piatnicu. Ale chaču zaznačyć, što za apošnija piać ci siem hadoŭ źnikli biaź viestak bolš jak 48 tysiač ludziej. Ź ich 99% urešcie rešt abjavilisia sami». «Ale, biezumoŭna, hetaje pytańnie ŭ poli zroku prakuratury», — padkreśliŭ hienprakuror.
Tym časam ułady Miensku admovili ŭdavie Zavadzkaha Śviatłanie ŭ praviadzieńni pikietu z nahody vośmaj hadaviny źniknieńnia jaje muža. Zajaŭka na praviadzieńnie akcyi kala haradzkoj ratušy na płoščy Svabody z 19.00 da 20.00 była padadziena 21 červienia. Mienharvykankam adchiliŭ jaje na toj padstavie, što ŭdzielniki pikietu mohuć pieraškodzić ruchu piešachodaŭ i transpartu.
Pikiet, prymierkavany da źniknieńnia Źmitra Zavadzkaha, planavałasia taksama pravieści ŭ Bieraści kala teatru dramy i muzyki. Adnak harvykankam nie dazvoliŭ pravodzić akcyju ŭ centry horadu.