Betlejemski ahoń prybudzie ŭ Biełaruś 15 śniežnia

14.12.2016 / 16:42

U Biełaruś ahoń ad niazhasnaj łampady ŭ bazylicy Naradžeńnia Pana ŭ Betlejemie dastaviać biełaruskija skaŭty. Na pačatku, 15 śniežnia, Betlejemski ahoń buduć sustrakać dušpastyry i vierniki Hrodna, a taksama skaŭty z roznych miescaŭ Biełarusi, jakija adviazuć jaho ŭ inšyja śviatyni krainy. U Minsk ahoń prybudzie 17 śniežnia, paviedamlaje partał Ryma-katalickaha kaścioła catholic.by.

Uračystaje ŭniasieńnie ahniu ŭ minskuju archikatedru adbudziecca ŭ subotu 17 śniežnia ŭ 22.30.

U niadzielu 18 śniežnia ahoń budzie dastaŭleny ŭ minskija parafii:

• 09.00 — parafija Božaha Cieła (vuł. Hierasimienki, 6/1)
• 09.15 — parafija Biezzahannaha Začaćcia Najśviaciejšaj Panny Maryi (Sucharava)
• 10.00 — parafija Sv. Jana Chryściciela (Sierabranka) i parafija Maci Božaj Budsłaŭskaj (Kamiennaja horka)
• 11.00 — parafija Najśviaciejšaj Trojcy (sv. Rocha) (Załataja Horka)
• 12.00 — parafija Sv. Jana Jevanhielista i sv. Maksimiljana Kolbe (Kuncaŭščyna-Masiukoŭščyna) i parafija Maci Božaj Ružancovaj (Łošyca)
• 15.00 — parafija Svv. Symona i Aleny (Čyrvony kaścioł).

Kaścioł zaprašaje dałučacca da akcyi ŭ sacsietkach, kab raskazać śvietu pra ahoń z Betlejema. Kožny, chto trymaje jaho ŭ rukach, moža zrabić fotazdymak i raźmiaścić jaho na svajoj staroncy z chešteham #agon'zbetleema2016.

«Śviatło Betlejemskaha ahniu, jakoje simvalizuje supakoj, nadzieju i zhodu, dziakujučy jednaści moładzi roznych krain pieraadolvaje značnyja adlehłaści i prychodzić da tych, chto jaho čakaje. Tamu varta ŭziać hety ahoń dadomu, jašče raz nahadać sabie i svaim blizkim pra nadychodziačaje śviata Božaha Naradžeńnia», — havorycca ŭ paviedamleńni partała.