Хатынскія артэфакты
У мэмарыяльным комплексе «Хатынь» знойдзеныя падчас будаўнічых работ артэфакты ляжаць нікому не патрэбныя проста пад адкрытым небам.
16.07.2008 / 12:37
Днямі мне зь сям’ёй давялося наведаць мэмарыяльны комплекс Хатынь. Упэўнены, што большасьць чытачоў там была (можа, нават неаднаразова), таму адразу перайду да зробленага мною цікавага назіраньня. У комплексе зараз вядуцца нейкія працы, пракапаныя траншэі паміж хаткамі. Відаць пракладваюць кабэль.
Каля адной з самых крайніх хатак, каля самага лесу рабочыя раскапалі рэчы, якія знаходзіліся ў зямлі і, відаць, калісьці належалі жыхарам вёскі. Рэчы так і пакінутыя на бэтонных вянцах, ляжаць абсалютна свабодна: прыходзь і бяры. На мой розум, такія рэчы ўяўляюць гістарычную каштоўнасьць, павінны быць сабраны, можа быць, перададзеныя ў музэі, бо гэта ж асабістыя рэчы жыхароў вёскі.
Мая жонка сказала пра нашую знаходку экскурсаводцы, якая пацьвердзіла, што рабочыя сапраўды знаходзяць рэчы, але адразу прыносяць іх у адміністрацыю. Цікаўнасьці да таго, што артэфакты ляжаць зараз проста так, яна не праявіла.