На радзіме Быкава сабраліся мастакі
20 ліпеня ў вёсцы Бычкі Ушацкага раёна Віцебскай вобласьці адкрыўся XVII Драздовіцкі мастацкі пленэр, прысьвечаны народнаму пісьменьніку Беларусі Васілю Быкаву.
21.07.2008 / 12:02
| Пленэр у Бычках у 2004 годзе | |
20 ліпеня ў вёсцы Бычкі Ушацкага раёна Віцебскай вобласьці адкрыўся XVII Драздовіцкі мастацкі пленэр, прысьвечаны народнаму пісьменьніку Беларусі Васілю Быкаву.
Арганізатарамі творчай акцыі выступілі Германовіцкі культурна‑асьветны цэнтар імя Язэпа Драздовіча (вёска Германовічы Шаркаўшчынскага раёну Віцебскай вобласьці) і суполка «Пагоня» Беларускага саюзу мастакоў.
Як паведаміла БелаПАН старшыня цэнтру Ада Райчонак, да ўдзелу ў пленэры запрошаны 20 чалавек. У іх ліку — мастакі Аляксей і Ігар Марачкіны, Алег і Ігар Скавародка, Георгій Скрыпнічэнка, Віктар Крук, Чэслаў Шамшур, Сяргей Прывада, Сьвятлана Баранкоўская, Георгій Ліхтаровіч, Кацярына Мясьнікова, Мікола Аўчыньнікаў, Ягор Мяжуеў, Уладзімер Вальноў, Алесь Шыёнак і Алесь Шатэрнік, а таксама навучэнцы каледжу мастацтваў імя Івана Ахрэмчыка.
У рамках творчай акцыі пройдуць сустрэчы зь сястрой пісьменьніка Валянцінай Быкавай, народным паэтам Беларусі Рыгорам Барадуліным, бардам Георгіем Станкевічам, а таксама выстава твораў, напісаных падчас пленэру, які будзе доўжыцца да 30 ліпеня.
Па традыцыі частку работ, створаных падчас знаходжаньня ў Бычках, мастакі дораць музэю‑сядзібе Васіля Быкава, які зьяўляецца філіялам Ушацкага музэю народнай славы імя Ўладзімера Лабанка.