U «Našaj Nivie» źmianiajecca redaktar
28.02.2017 / 13:30
Z 1 sakavika Andrej Skurko sychodzić z pasady hałoŭnaha redaktara «Našaj Nivy». Vydańnie i sajt NN.BY uznačalić Jahor Marcinovič.
Jahor Marcinovič pracuje ŭ «NN» z 2009 hoda. Jon aŭtar rasśledavańniaŭ, repartažaŭ i intervju. Jahonyja materyjały byli adznačanyja šmatlikimi nacyjanalnymi i mižnarodnymi premijami.
Vam cikava budzie viedać, što Jahor Marcinovič — syn piśmieńnika Alesia Marcinoviča i supracoŭnicy časopisa «Mastactva» Taćciany Mušynskaj, unuk člena-karespandenta Akademii navuk Biełarusi Michasia Mušynskaha. Jon skončyŭ Licej BDU i Instytut žurnalistyki BDU.
Andrej Skurko zastaniecca pracavać u «NN» na pasadzie namieśnika hałoŭnaha redaktara. Skurko ŭznačalvaŭ «NN» z 2006 da 2017 hoda — pa praciahłaści heta rekord terminu na pasadzie. Dla paraŭnańnia: Alaksandr Ułasaŭ uznačalvaŭ vydańnie 8 hadoŭ, Siarhiej Dubaviec — 9 hadoŭ. Heta byli 11 niaprostych hadoŭ, z kałasalnymi fizičnymi i psichałahičnymi nahruzkami. Hetyja hady stali taksama słaŭnymi hadami rostu vydańnia ŭ internecie. My vykarystali kryzis papiarovaj presy i ciažkaści jak šaniec dla raźvićcia. «NN» zamacavałasia ŭ pazicyi samaha papularnaha partała na biełaruskaj movie. Na siońnia «NN» maje 7 miljonaŭ prahladaŭ u internecie štomiesiac, zajmajučy 3—4 miesca pa hetym pakazčyku siarod usich-usich biełaruskich ŚMI, biełaruskamoŭnych i rasiejskamoŭnych. «NN» dakazała, što internet-partał na biełaruskaj movie moža być paśpiachovy.
Kalektyŭ «NN» mocna dziakuje Andreju Skurko za ŭsio, što jon zrabiŭ dla vydańnia.
Našaniŭskija pryncypy zastanucca niaźmiennyja. Ale na piaredni płan u «NN» vychodzić čarhovaje, novaje pakaleńnie sa svajoj kancepcyjaj.