Kiraŭnictva Samsung syšło ŭ adstaŭku z-za abvinavačvańniaŭ u karupcyi
28.02.2017 / 21:22
Top-mieniedžary karejskaj kampanii Samsung pakinuli svaje pasady ŭ aŭtorak na fonie karupcyjnaha skandału ŭ Paŭdniovaj Karei, jaki pryvioŭ da impičmientu prezidenta krainy Pak Kyn Che, piša VVS.
Prakuratura Paŭdniovaj Karei zajaviła ŭ aŭtorak, što vice-prezidentu i faktyčnamu kiraŭniku kampanii Li Čže Jenu i jašče čatyroch top-mieniedžaram kampanii buduć vystaŭlenyja abvinavačvańni ŭ dačy chabaraŭ i rastracie.
Adrazu paśla hetaj zajavy svaje pasady pakinuli try z čatyroch top-mieniedžaraŭ, zhadanych prakuraturaj, u tym liku vice-staršynia kampanii Čchvie Ki-son i prezident Čan Čchun-ki.
Li Čže Jen byŭ aryštavany ŭ siaredzinie lutaha z-za abvinavačvańniaŭ u karupcyi.
Z taho času, jak jaho baćka Li Hon Chi pieranios infarkt, Li Čže Jen ličycca faktyčnym kiraŭnikom karparacyi, i, niahledziačy na aryšt, jon pakul zachoŭvaje svoj post.
Miž tym Samsung abviaściŭ ab pačatku restrukturyzacyi kampanii. U pryvatnaści, rasfarmavany ofis stratehii budučyni — adździeł kampanii, jaki kaardynuje jaje pracu. Li raniej abiacaŭ rasfarmavać hety adździeł, bo mienavita jaho supracoŭnikaŭ abvinavačvajuć u dačy chabaraŭ paŭdniovakarejskim čynoŭnikam.
Abvinavačvańni ŭ adras top-mieniedžmientu kampanii źviazanyja ź dziejnaściu Čchvie Sun Sil, siabroŭki prezidenta Pak Kyn Che. Raniej śledstva vyjaviła, što Čchvie Sun Sil niezakonna prymušała bujny biznes unosić šmatmiljonnyja achviaravańni ŭ dva źviazanyja ź joj niaŭradavyja fondy. Ci abvinavačvajuć u pieradačy hrošaj u hetyja fondy.
Pa viersii abvinavačvańnia, Ci pieraličyŭ 41 młrd von (36 młn dalaraŭ) u adzin z fondaŭ Čchvie Sun Sil, kab urad, siarod inšaha, zakryŭ vočy na pieradaču kirujučaha pasta ŭ karparacyi pa spadčynie.
Kiraŭnika kampanii nieadnarazova dapytvali pa hetaj spravie. Raniej Li pryznaŭ, što Samsung padaravaŭ dačce Čchvie Sun Sil kania dla zaniatkaŭ konnym sportam, pra što jon, pa jaho słovach, ciapier škaduje. Adnak abvinavačvańni ŭ dačy chabaraŭ Li i inšyja kiraŭniki Samsung adprečvajuć.
Parłamient Paŭdniovaj Karei ŭ śniežni prahałasavaŭ za impičmient Pak Kyn Che. Jaje spravu pavinien razhladzieć kanstytucyjny sud krainy, jana adchilenaja ad pasady prezidenta.
Suprać jaje siabroŭki Čchvie Sun Sil rasśledujucca niekalki spraŭ.