Miasa «z prabirki» patańnieła ŭ 30 000 razoŭ. Chutka na našych stałach?
Technałohija vytvorčaści ŭ łabaratoryjach štučnaha miasa stała bolš dastupnaj, paviedamlaje partał Next Big Future.
06.03.2017 / 17:07
Upieršyniu miasa «z prabirki» źjaviłasia ŭ 2013 hodzie. Pieršy hamburhier sa štučnaha miasa byŭ pryhatavany i źjedzieny na pres-kanfierencyi ŭ Łondanie. Bijołah Mark Post z Univiersiteta Maastrychta, jaki raspracavaŭ technałohiju vyroščvańnia miasa sa stvałavych kletak karovy, tady adznačyŭ, što pieršy hamburhier sa štučnaj jałavičyny kaštavaŭ 325 tysiač dalaraŭ. Zaraz Mark Post paviedamiŭ, što taki hamburhier kaštuje ŭžo kala 11 dalaraŭ, a kiłahram štučnaha miasa — kala 80 dalaraŭ. Takim čynam, sabiekošt takoha miasa źmienšyŭsia za čatyry hady ŭ 30000 razoŭ.
Pakul, praŭda, takoje miasa kaštuje prykładna ŭ 10 razoŭ bolš, čym zvyčajnaje, ale technałohija jaho vytvorčaści budzie stanavicca jašče bolš tannaj. Mark Post adznačyŭ, što jaho kampanija Mosa Meat budzie pradavać vyraščanuju ŭ łabaratoryi jałavičynu ŭžo praz 5 hadoŭ, kali jaje košt zraŭniajecca z koštam zvyčajnaha miasa.
U hałandskaj Mosa Meat užo zaraz jość niekalki kankurentaŭ, jakija zajmajucca padobnymi raspracoŭkami:
- Gelcor, Kalifornija, vytvorčaść žyviolnaha žełacinu
- Perfect Foods, Kalifornija, małočnyja pradukty
- Clara Foods, Kalifornija, jaječnyja białki
- Memphis Meats, Kalifornija, jałavičyna i śvinina
- SuperMeat, Izrail, kurynaja piačonka
Praces vytvorčaści miasa ŭ łabaratoryi ŭklučaje ŭ siabie atrymańnie ciahličnych kletak žyvioł z vykarystańniem białku, jaki dazvalaje kletkam vyrastać u vialikija kavałki miasa.
Miasa «z prabirki» dapamoža vyrašyć vialikuju kolkaść prablem. Pa-pieršaje, patańnieńnie vytvorčaści miasa zrobić jaho bolš dastupnym, što dapamoža vyrašyć prablemu charčovaj biaśpieki ŭ biednych krainach. Pa-druhoje, štučnaje miasa budzie papularnym siarod tych viehietaryjancaŭ, jakija admaŭlalisia ad zvyčajnaha miasa pa etyčnych pryčynach. Sacyjałahičnyja daśledavańni pakazvajuć, što kala pałovy viehietaryjancaŭ budzie jeści miasa, jakoje źjaviłasia ŭ łabaratoryi, a nie ŭ vyniku zabojstva žyvioły.