«U siamji nie biez vyradka». Šunievič pryznaŭ, što čałaviek, jaki skraŭ $270 tysiač z budynka MUS, — supracoŭnik milicyi

21.04.2017 / 09:44

Čałaviek, jaki skraŭ ź siejfa budynka HUBAZiK MUS amal 270 tysiač dalaraŭ, źjaŭlajecca supracoŭnikam pravaachoŭnych orhanaŭ, raspavioŭ TUT.BY ministr unutranych spraŭ Ihar Šunievič.

«Idzie śledstva. Rasśledavańniem zajmajecca Śledčy kamitet. Vykradzienyja ź siejfa hrošy byli kanfiskavanyja ŭ čałavieka, jaki prachodzić padazravanym pa adnoj z kryminalnych spraŭ», — raskazaŭ ministr.

«U siamji nie biez vyradka», — adkazaŭ jon na pytańnie žurnalistaŭ, ci źjaŭlajecca padazravany ŭ kradziažy supracoŭnikam pravaachoŭnych orhanaŭ.

Nahadajem, na kaladnyja śviaty ź siejfa ŭ budynku, u jakim znachodzicca Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj MUS Biełarusi (HUBAZiK), byli vykradzieny amal 270 tysiač dalaraŭ. Pra heta stała viadoma z pastanovy Šaŭčenkaŭskaha rajonnaha suda Kijeva, apublikavanaha ŭ Adzinym dziaržaŭnym rejestry sudovych rašeńniaŭ Ukrainy.

Jak vynikaje z dakumienta, padazravany kala 9 hadzin ranicy 8 studzienia 2017 hoda, dziejničajučy naŭmysna, z karyślivych mierkavańniaŭ, tajemna vykraŭ ź siejfa ŭ kabiniecie № 107 administracyjnaha budynka pa adrasie: horad Minsk, vulica Revalucyjnaja, dom 3, hrašovyja srodki ŭ pamiery 269 150 dalaraŭ. Dniom taho ž dnia jon pierasiok dziaržaŭnuju miažu Biełarusi i vyjechaŭ va Ukrainu, dzie sustrakaŭsia z hramadziankaj Ukrainy. Ranicaj 9 studzienia złamyśnik vyjechaŭ z Ukrainy ŭ Rumyniju.