U Makiedonii ŭ vyniku šturmu parłamienta paranieny lidar kirujučaj kaalicyi
27.04.2017 / 22:15
U Makiedonii pratestoŭcy pranikli ŭ budynak parłamienta. Heta adbyłosia paśla taho, jak kaalicyja, jakuju ŭznačalvajuć sacyjał-demakraty, abrała śpikieram parłamienta Ali Achmieci, etničnaha ałbanca, lidara Demakratyčnaha sajuza za intehracyju, jaki pradstaŭlaje intaresy ałbancaŭ ŭ Respublicy Makiedonija. Pra heta paviedamlaje RBK sa spasyłkaj na miascovaje ahienctva MINA.
Pa infarmacyi ahienctva, pratestoŭcy ličać, što deputaty ruchu SDSM (Sacyjał-demakratyčny sajuz Makiedonii) sprabujuć niezakonna abrać novaha kiraŭnika parłamienta. Napružanaść uzrasła paśla taho, jak parłamientaryi SDSM atačyli ciapierašniaha śpikiera parłamienta Trajka Vielanoski, sprabujučy siłaj vyvieści jaho z zały.
Na videa, jakoje apublikavała ahienctva, natoŭp pratestujučych, praryvajučysia ŭ budynak, śpiavaje himn krainy i zaklikaje da novych vybaraŭ u parłamiencie.
Ahienctva paviedamlaje, što ludzi, jakija prarvalisia ŭ zału, napali na deputataŭ SDSM. Kiraŭnik makiedonskaj apazicyjnaj Sacyjał-demakratyčnaj partyi Zoran Zajeŭ atrymaŭ traŭmu.
Na parłamienckich vybarach, jakija prajšli ŭ Makiedonii ŭ śniežni 2016, pieramahła partyja byłoha premjer-ministra krainy Nikoły Hrujeŭskaha. Jaho partyja DPMNIE (Demakratyčnaja partyja za makiedonskaje nacyjanalnaje adzinstva) nabrała 38,1% hałasoŭ. Asnoŭny supiernik — partyja «Sacyjał-demakratyčny sajuz Makiedonii» nabrała tady 36,7% hałasoŭ.