U Vieniesuele antyŭradavyja łozunhi skandavali na futbole

14.06.2017 / 09:52

Futbalisty moładzievaj zbornaj Vieniesueły tancujuć na stadyjonie. Ich sustreli jak nacyjanalnych hierojaŭ. Fota Rojterz.

Cyrymonija ŭšanavańnia moładzievaj zbornaj Vieniesueły pa futbole pieratvaryłasia ŭ antyŭradavuju demanstracyju.

Y va a caer, y va a caer, este gobierno va a caer! — «Padzie, padzie, urad padzie!» — skandavali ludzi papularny słohan z manifiestacyj, pišuć vieniesuelskija niezaležnyja ŚMI.

Kala 20 tysiač čałaviek sabralisia na Alimpijskim stadyjonie Karakasa na pavitańnie moładzievaj zbornaj da 20 hadoŭ, jakaja ŭpieršyniu ŭ historyi krainy vyjšła ŭ finał suśvietnaha pieršynstva.

Futboł u krainie byŭ mienš papularny za biejsboł — moža tamu, što futbalisty nikoli nie dasiahali vialikich pośpiechaŭ. Vieniesuelcy raŭniva sačyli za ŭdačami susiedziaŭ z Brazilii i Kałumbii.

Pierad pačatkam cyrymonii na trybunach vybuchnuli i byli masava padtrymanyja skandavańni suprać prezidenta Madura i jahonaha «balivaryjanskaha režymu».

Pratesty ŭ Vieniesuele praciahvajucca ŭžo dva miesiacy. Jany majuć hvałtoŭny charaktar, u ich zahinuli 68 čałaviek z abodvuch bakoŭ, jašče tysiačy byli paranienyja. Pryčynaj stała praciahłaje paharšeńnie ekanamičnaha stanovišča, vysokaja inflacyja i devalvacyja nacyjanalnaj valuty.