Па Вільні прайшлася наймагутнейшая з 1993 года залева: 60 аварыйных сітуацый
У Вільні праз залеву ў чацвер закрыта Заходняя аб'язная дарога, у некалькіх месцах адбылося спаўзанне адхонаў, сітуацыя застаецца напружанай.
29.06.2017 / 13:26
Delfi.lt
Па словах прадстаўнікоў гарадскога самакіравання, гэта наймацнейшая залева ў літоўскай сталіцы з 1993 года. Да 12:00 у горадзе зафіксавана 60 аварыйных сітуацый.
«Спазненні (грамадскага транспарту), без сумневу, раніцай мелі месца, дарожны рух максімальна адноўлены, графікі аднаўляюцца. Але ніхто не можа прагназаваць, што будзе сёння пасля абеду», — сказаў журналістам дырэктар Дэпартамента гарадскога гаспадаркі і транспарту Віленскага самакіравання Віргініюс Паўжа.
Паводле яго слоў, аб'язная дарога затопленая з-за таго, што забілася сістэма вадасцёкаў, спецыялісты ліквідуюць аварыю. З-за маланак не працавалі святлафоры на 15 скрыжаваннях горада. З раніцы ў горадзе выпала 48 міліметраў ападкаў. «Падобная колькасць ападкаў выпадала толькі ў 1993 годзе. Сітуацыя на самай справе не шараговая», — сказаў ён.
Залева сёння прайшлася над паўночна-заходнімі раёнамі Беларусі.