Zabojstva Niamcova: prysiažnyja pryznali ŭsich padsudnych vinavatymi
29.06.2017 / 19:35
Kalehija prysiažnych zasiadacielaŭ Maskoŭskaha akruhovaha vajskovaha suda ŭ čaćvier, 29 červienia, vyniesła vierdykt u dačynieńni da piaci čałaviek, abvinavačanych u padrychtoŭcy i zabojstvie rasijskaha apazicyjnaha palityka Barysa Niamcova. Prysiažnyja šlacham hałasavańnia paličyli usich padsudnych vinavatymi, pieradaje DW.
Hałasavańnie nie było adnahałosnym. 10 prysiažnych paličyli vinavatym byłoha aficera čačenskaha bataljona «Poŭnač» Zaura Dadajeva, jakoha śledstva nazyvała niepasrednym vykanaŭcam zabojstva Barysa Niamcova. Dvoje prysiažnych znajšli, što jaho vina ŭ zabojstvie nie dakazanaja. Pry hetym 8 zasiadacielaŭ z 12 zajavili, što Dadajeŭ nie zasłuhoŭvaje łaski.
Za toje, što Anzor i Šadzid Hubašavy vinavatyja i nie zasłuhoŭvajuć łaski, prahałasavali 11 z 12 prysiažnych, za vinavataść Tamierłana Eskierchanava vykazalisia 10 zasiadacielaŭ, i Chamzata Bachajeva — 8. Zhodna z normami rasijskaha zakanadaŭstva abvinavaŭčy vierdykt ličycca pryniatym, kali za śćviardžalnyja adkazy na pytańni ab dakazanaści padziei złačynstva, dziejańni padsudnaha i jaho vinavataści prahałasavała bolšaść prysiažnych zasiadacielaŭ.
Akramia taho, usie padsudnyja pryznanyja vinavatymi ŭ zachoŭvańni zbroi. Prysiažnyja paličyli, što jany nie zasłuhoŭvajuć łaski pa hetym pytańni.
Nastupstvy vierdyktu sud abmiarkuje u aŭtorak, 4 lipienia, u 11 hadzin.
Raniej padsudnyja, vystupiŭšy z apošnim słovam, zajavili ab svajoj nievinavataści i paprasili apraŭdać ich. Razhlad rezanansnaj spravy praciahvaŭsia dzieviać miesiacaŭ.
Na dumku svajakoŭ Barysa Niamcova, sprava zastałosia nieraskrytaj, paviedamiła dačka Niamcova Žanna. Pa jaje słovach, vina Chamzata Bachajeva nie padmacavanaja dastatkovaj kolkaściu dokazaŭ. Namieśniku kamandzira bataljona «Poŭnač» Rusłanu Hieramiejevu, što naležyć blizkamu kołu Ramzana Kadyrava, nie było vystaŭlena zavočnaha abvinavačvańnia, i jon nie abjaŭleny ŭ vyšuk, choć «śledstvam było praktyčna dakładna ŭstanoŭlena», što jon byŭ staršym u złačynnaj hrupie. Nie byŭ znojdzieny vierahodny adzin z vykanaŭcaŭ — kiroŭca Hieramiejeva Rusłan Muchudzinaŭ, jakomu vystaŭlenaje zavočnaje abvinavačvańnie ŭ arhanizacyi zabojstva.
Barys Niamcoŭ byŭ zabity strełami ŭ śpinu ŭ noč na 28 lutaha 2015 hoda na Vialikim Maskvareckim moście. Mierkavany arhanizatar hetaha złačynstva, bajec bataljona «Poŭnač» MUS Čačni Rusłan Muchudzinaŭ, byŭ zavočna aryštavany i abvieščany ŭ fiederalny i mižnarodny vyšuk. Pavodle danych śledstva, jon chavaŭsia ŭ Abjadnanych Arabskich Emiratach, kudy vyjechaŭ pa padroblenych dakumientach.