Газеты і часопісы ў Беларусі цяпер будуць выходзіць з узроставай маркіроўкай

02.07.2017 / 10:39

Прадукцыя СМІ ў Беларусі з 1 ліпеня будзе распаўсюджвацца з узроставай маркіроўкай, паведамляе БелТА. Гэта прадугледжана папраўкамі ў законы «Аб сродках масавай інфармацыі» і «Аб выдавецкай справе ў Рэспубліцы Беларусь». Маркіроўку ўводзяць дзеля абароны дзяцей ад інфармацыі, якая можа «нанесці шкоду іх здароўю і развіццю».

Маркіроўку прадукцыі СМІ і друкаваных выданняў павінны ўводзіць рэдакцыі, а таксама выдаўцы. Адметна, што выданні, якія выйшлі да 1 ліпеня 2017 года, могуць заставацца без такой маркіроўкі.

Градацыя маркіровак будзе наступнай: «0+» — без абмежаванняў па ўзросце, «6+» — для дзяцей ад 6 год, «12+» — для падлеткаў ад 12 год, «16+» — для асобаў ад 16 год і «18+» — для асобаў ад 18 год.

Для інфармацыйных рэсурсаў, размешчаных у інтэрнэце, прадугледжаны добраахвотны парадак маркіроўкі.