«Jon taki razumny, a jana viasiołaja»
19.09.2017 / 13:40
Sajuz biełaruskich piśmieńnikaŭ vypuściŭ unikalnuju dziciačuju knihu «Supierkniha pra Biła z Bołaju» pra maleńkuju dziaŭčynku z abmiežavanymi mahčymaściami. Heta pieršaja kniha pa-biełarusku, dzie pranikniona i realistyčna raspaviadajecca pra siamju, u jakoj raście niezvyčajnaje dzicia.
U chłopčyka Biła źjaŭlajecca maleńkaja siastryčka Boła — nahoda dla radaści, viesiałości i honaru. Ale čas idzie, i pastupova siamja pačynaje razumieć, što z Bołaj adbyvajecca niešta nie toje, jana zusim nie razmaŭlaje. Kniha ŭ vieršavanaj formie raspaviadaje pra žyćcio maleńkaj dziaŭčynki, jakaja nikoli nie budzie jak usie. Pra źviazanyja z hetym radaść i hora, nadzieju i rospač. Pra toje, nakolki my hatovyja žyć pobač z tymi, chto nie padobny da nas. Ale najpierš hetaja kniha pra luboŭ i zdolnaść prymać.
«Supierknihu pra Biła z Bołaju» pierakłali na biełaruskuju movu Nadzieja Kandrusievič i Alesia Bašarymava, a talenavity biełaruski paet Andrej Chadanovič zrabiŭ tak, kab pierakład zahučaŭ napoŭnicu — emacyjna i kranalna. Apovied viadziecca ad imia Biła, brata Boły, ź jakim čytač razam pieražyvaje ŭsiu hamu pačućciaŭ — i ščaście, i bol, i złość, i zamiłavańnie. I rozdum:
«Kab nie mieli my pobač nikoha,
Kamu treba ad nas dapamoha,
Kab nichto choć by raz nie prasiŭ ab maleniečkim cudzie, —
Dyk navošta isnuje naš ROZUM
I ŭvohule — LUDZI?!»
Aŭtarka knihi — šviedskaja piśmieńnica Huniła Berhstrem. Z 1971 hoda jana napisała kala 40 dziciačych knih, jakija sama i prailustravała. Jana pisała historyju Biła i Boły sa svajoj ułasnaj siamji: u jaje dvoje dziaciej, a ŭ małodšaj dački aŭtyzm.
Knihi pra Biła i Bołu — kłasika šviedskaj litaratury, jany šyroka čytajucca ŭ kaledžach i navučalnych ustanovach. Pavodle ich źniatyja animacyjnyja filmy i zroblenyja teatralnyja pastanoŭki. A ŭ 2012 hodzie na knižnym kirmašy ŭ Hioteborhu Hunile Berhstrem uručyli załaty miedal «za novy padychod u napisańni i afarmleńni dziciačaj knihi ź biezdakornym adčuvańniem dziciačaha śvietapohladu».
«Supierknihu pra Biła z Bołaju» ŭžo ŭ prodažy, jaje možna nabyć pa nastupnych adrasach:
Minsk:
«Centralnaja kniharnia» (pr-t Niezaležnaści, 19),
«Akademkniha» (pr-t Niezaležnaści, 72),
«Knihi i knižački» (pr-t Niezaležnaści, 14),
«Kniharnia piśmieńnika» (vuł. Kazłova, 2),
«Śvietač» (pr-t Pieramožcaŭ, 11),
«Viedy» (vuł. K. Marksa, 36),
Etnakrama «Rahna» (vuł. Suchaja, 4),
Internet-krama Knihi.by,
Aleś Dudar (HC «Arena-sici»),
«Vydatnyja knihi» (Niamiha,3 boks 21),