Były palitviazień Andrej Bandarenka: Uspaminy błohiera Łapšyna — paklop na Vaładarku

Z abviaržeńniem mnohich rečaŭ pra ŭtrymańnie ŭ biełaruskaj turmie, apisanych błohieram Łapšynym, vystupiŭ u svaim fejsbuku były palitviazień Andrej Bandarenka.

20.09.2017 / 10:11

Heta, napeŭna, pieršy vypadak, kali «Płatforma» zastupajecca za ajčynnuju pienitencyjarnuju sistemu, abviarhajučy adkryty paklop viadomaha błohiera.

Mnie składana skazać, ź jakoj pryčyny Alaksandru Łapšynu spatrebilisia heta chłuśnia, ale kali ŭžo ja nie vytrymaŭ, to možna ŭjavić, čaho jon tam panapisvaŭ.

Toje, što bytavyja ŭmovy SIZA-1 zastajucca niezdavalniajučymi, — užo daŭno nie sakret. I heta, pa sutnaści, adzinaje, što aŭtar adlustravaŭ bolš-mienš realistyčna, kali adkinuć usio «fašystoŭskija» prajavy (čaho ja ni razu nie čuŭ u SIZA-1). U astatnim — poŭnaja biazhłuździca.

1. Jak vyśvietliłasia, amal usie sukamierniki siadziać užo daŭno ŭ čakańni suda, niekatoryja pa 2 hady (!), i da ich jašče navat nie prychodziŭ śledčy.

— Navat składana heta niejak prakamientavać, pakolki śledčyja źjaŭlajucca z zajzdrosnaj rehularnaściu, a da terminu ŭtrymańnia pad vartaj SIZA nie maje nijakaha dačynieńnia.

2. Pra śniadanak. Vyhladaje heta tak: rasčyniajecca akienca i razdajecca kryk «Kaaaaaša».

— Charčavańnie razdajuć pa časie i nichto nie kryčyć. U hetym niama sensu, mieniu na kožny dzień źniavolenyja viedajuć.

3. U nas kamiera elitnaja, možna talerku pamyć u rakavinie, ale ŭ inšych kamierach rakaviny paprostu niama.

— Va ŭsich kamierach jość rakaviny i tualet.

4. U turmie dafiha chvorych na tubierkuloz, pryčym pa pryčynie pierapoŭnienaści kamier mnohija ź ich siadziać razam sa zdarovymi.

— Chvorych na suchoty vielmi mała i siadzić jany asobna.

5. Kali vam nie prynosiać pieradačy rodnyja — vy chutka pačniacie chvareć i ŭ vyniku zahiniecie. Na ščaście, biełaruskija siadzielcy škadujuć zamiežnikaŭ i dzielacca ź imi svaimi chatnimi pieradačami.

— Charčavańnie ŭ SIZA-1 całkam jadomaje, ale i jaho biaruć tolki dla harniru da 30 kh pieradač, jakija dazvoleny na miesiac.

6. Spatkańnie ź siamjoj raz na miesiac na paŭhadziny praz škło, pryčym načalstva čaściej za ŭsio nijakich spatkańniaŭ nie dazvalaje biez tłumačeńniaŭ pryčyn.

— Spatkańni abvinavačanym nie dazvolili naohuł, tolki z dazvołu śledčaha.

7. Jašče nie dazvalajecca čytać knihi! Heta nie žart.

— Kožny tydzień knihi razdajucca miascovaj biblijatekaj, a ŭ listach i pieradačach ich možna pieradavać kolki zaŭhodna. Z peŭnymi, jasnaja sprava, abmiežavańniami.

8. Pa sakrecie sukamierniki dzialilisia, što kali z voli praz «adnaho čałaviečka» pieradać hrošy, to i spatkańnie ź siamjoj dazvolać čaściejšyja i kamiery mohuć dać lepšyja. Jašče za chabar možna damovicca, kab vam u kamieru pastavili televizar, heta vam abydziecca prykładna ŭ 500 jeŭra chabaru. Pieravod u lepšuju kamieru kaštuje 1000—1500 jeŭra na miesiac. Lehčy ŭ špital — jašče kala 2000 jeŭra na miesiac.

— Televizar u kamieru administracyja pa zajavie daść biaspłatna abo možna zamović jaho z voli praz svajakoŭ i zabrać nazad paśla vychadu abo etapavańnia na zonu. A pieravod u kamieru za 1500 u.ie. vyklikaje ŭśmiešku i sumnievy ŭ adekvatnaści aŭtara. Jak i suma «lehčy» ŭ balnicy, u jakuju prosta patrapić pry najaŭnaści zachvorvańnia.

Artykuł aŭtara nie bolš čym sacyjalnaja fantastyka, vielmi padobnaja da banalnaj chłuśni. U biełaruskich turmach dosyć niedachopaŭ, za jakija ich možna krytykavać. Dastatkova vypadkaŭ parušeńnia pravoŭ čałavieka. Ale dla čaho ich vinavacić u tym, čaho niama? Mnie zdajecca, što padobnyja vykazvańni niedapuščalnyja dla peŭnaha ŭzroŭniu aŭtaraŭ, davier da jakich paśla takich publikacyj źnikaje spres.