«Ty im prakapaŭ mietro, jany tabie prakapali mahiłu». Vinsent napisaŭ rep-list rasstralanamu litarataru Ziamu Pivavaravu AŬDYJO

18.10.2017 / 12:29

Jon vieryŭ u idei kamunistaŭ, a pa vyniku ad ruk kamunistaŭ i zahinuŭ va ŭzroście 27 hod. Reper Vinsent dla prajektu partału TuzinFM «(Nie)rasstralanaja paezija» pračytaŭ u repie vierš «Metrapaliten» Ziamy Pivavarava i napisaŭ da jaho praciah.

Mienavita vierš sa zborniku «Liryka dvuch naradžeńniaŭ» (1934), napisany pad natchnieńniem ad budaŭnictva maskoŭskaha metro, pryciahnuŭ uvahu repera. «U tvorčaści Pivavarava chapała inšych temaŭ, pra tuju ž harotnuju sialanskuju dolu biełarusaŭ, ale mianie kranuŭ mienavita hety vierš jakraz svajoj nietypovaściu. Paet zaklikaje da jednaści z ujaŭnym maskvičom ź jakim my prakładvajem metro, «pad Ajčynaj majoj, pad Ajčynaj tvajoj». Vierš mocny, vyrazny, u niejkim sensie niezvyčajny, bo nietypovaja jość sama tema», — tłumačyć Vinsent. Aryhinalny tvor jon uziaŭ za asnovu pieśni — vierš hučyć całkam u pieršaj častcy treku. A ŭ druhoj — ułasny tekst repera, jahonyja razvahi na temu bolš čym praz 80 hadoŭ ad napisańnia «Metrapalitena».

PADTRYMAĆ PRAJEKT NA TALAKA.BY

Vinsent kaža, što dałučyŭsia da prajektu «(Nie)rasstralanaja paezija», bo praź jaho možna pryciahnuć uvahu da tych asobaŭ, jakija budavali novuju biełaruskuju kulturu, a taksama pieraasensavać ich tvorčaść. «Ziama Pivavaraŭ pavieryŭ u «śvietłyja» idei kamunistaŭ, a potym ad ich ža i paciarpieŭ. Dziakujučy peŭnaj histaryčnaj perspektyvie my majem bolš poŭnuju karcinu padziej i možam rabić svaje vysnovy, kab nie rabić takich pamyłak», — kaža vykanaŭca.

Ziama Pivavaraŭ pisaŭ vieršy z 15 hod, aktyŭna drukavaŭsia, pierakładaŭ rasiejskich paetaŭ na biełaruskuju, vystupaŭ jak teatralny i kinakrytyk. Kala troch hod žyŭ u Leninhradzie, dzie pracavaŭ kačaharam. Paśpieŭ skončyć litaraturny fakultet u mienskim pedahahičnym instytucie dy pabačyć svoj pieršy paetyčny zbornik. Va ŭzroście 26 hod jaho aryštavali, a ŭnačy 29 kastryčnika 1937 hodu rasstralali. Padrabiaźniej pra žyćcio i tvorčaść paeta Ziamy Pivavarava raspaviadzie Viktar Žybul u miežach prajektu «(Nie)rasstralanaja paezija» 27 kastryčnika na adkrytaj lekcyi ŭ kniharni «Łohvinaŭ». Čakajecca ŭdzieł i Vinsenta. Pieśniu «Metrapaliten» vykanaŭca źbirajecca ŭklučyć u svoj trek-list i vykonvać na kancertach.

NABYĆ KVITOK NA KANCERTNUJU PREZENTACYJU PRAJEKTU «(NIE)RASSTRALANAJA PAEZIJA»

Vinsent — Metrapaliten

(muzyka — Vinsent, słovy — Ziama Pivavaraŭ i Vinsent)

Prapaŭzuć pad ziamloj
rejki-kalainy,
Brudnaja kara ziamli
ŭździorta.
Heta niastomny ŭdar
pa hlinie
Kajła
kamsamolskaj
kahorty.

Metrapaliten!
Razam z sercam našym i ŭ tacht zalaskaj,
Prarvi sotni
niekranutych
mil.
Metrapaliten —
nie fantastyčnaja kazka,
A balšavickaja
słaŭnaja
byl.

Skałatnuła stalica
pył viakoŭ,
Mudry salut addaje Kramlu,
padniaŭšy hrunt
metrapalitenny,
I zvany jaje cerkvaŭ
(saraka sarakoŭ)
3 hułam raźbilisia
ab ziamlu,
Pradčuvajučy huł
padziemny.

Maskvič!
U zialonym vahonie
pad Maskvoj
Pad ajčynaj tvajoj,
pad ajčynaj majoj —
Praimčym,
niby śmierč
uzbuntavanych marej,
Kab dryžeła pad špałaj
prybitaja hlina.
Maskvič!
My zrobim z taboj
jašče adzin rejs
U mahutnuju moładaść
Našaj krainy —
Pad ajčynaj tvajoj,
pad ajčynaj majoj.

Pad Ajčynaj majoj biažyć metro,
Nad Ajčynaj majoj šumiać hai.
Heta hai nie biełastvołych biaroz,
A miljony viekapomnych duboŭ.
Dzieści pad Mienskam šumić Niamiha,
Ale ja baču tolki cichuju Śvisłač,
Ty žadaŭ hrukat stalovych mašynaŭ,
My atrymali kurapackuju cišu…

Ad «Kamienki» i da «Kupałaŭskaj»
Plus pierasadka, a potym prosta da «Pieramohi»,
Ja vychodžu z metro, idu ŭharu,
Minaju Dom radyjo, plus kvartał niaśpiešna, i ja ŭžo doma.
Padziemka dastavić ciabie dakładna kudy treba,
U luby punkt i kropku ziamli i nieba,
Ty tolki budź łaskavy, svajo žadańnie praličy,
Siadaj, začyniajucca dźviery, my z taboju imčym.
Kožny maje svoj čas i epochu, heta viadoma,
Ty žyŭ i vieryŭ, słužyŭ śvietłaj idei.
Ale vyjaviłasia, što heta prosta słovy.
Słovy, što źniščyli ŭsio pakaleńnie.
Paecie, usio cudoŭna, ja tolki nie razumieju
I ad hetaje dumki i śviet niamiły.
Ty im prakapaŭ metro,
Jany tabie prakapali mahiłu.

Ni Maskvie, ni Berlinu,
Ni Maskvie, ni Berlinu,
Ja tolki za hetuju śviatuju ziamlu zahinu.
Pad Ajčynaj majoj, pad Ajčynaj majoj,
Pad Ajčynaj majoj, pad Ajčynaj majoj.
Ni Maskvie, ni Berlinu,
Ni Maskvie, ni Berlinu,
Ja tolki za hetuju śviatuju ziamlu zahinu.
Pad Ajčynaj majoj, pad Ajčynaj majoj,
Pad Ajčynaj majoj, pad Ajčynaj majoj.

Heta šumić metro
Pad Ajčynaj majoj.
Tysiačy tut viatroŭ
Nad Ajčynaj majoj.

Heta biažyć žyćcio
Pad Ajčynaj majoj
Nad Ajčynaj majoj
Pad Ajčynaj majoj.

Pad Ajčynaj, nad Ajčynaj, pad Ajčynaj, nad Ajčynaj, pad Ajčynaj, nad Ajčynaj…

Ni Maskvie, ni Berlinu,
Ni Maskvie, ni Berlinu,
Ja tolki za hetuju śviatuju ziamlu zahinu.
Pad Ajčynaj majoj, pad Ajčynaj majoj,
Pad Ajčynaj majoj, pad Ajčynaj majoj.

(1934/2017)