U Minsku buduć sudzić biespracoŭnaha, jaki vykinuŭ ščaniuka taksy ź piataha paviercha

17.11.2017 / 16:28

U minski sud pieradadzienaja sprava biespracoŭnaha, jaki padčas užyvańnia ź siabrami ałkaholnych napojaŭ vykinuŭ ź piataha paviercha ščaniuka taksy, što naležaŭ jahonaj znajomaj. Sabaka zahinuŭ, paviedamlaje Śledčy kamitet.

Śledstvam ustanoŭlena, što mužčyna ranicaj 26 žniŭnia 2017 hoda ŭ kvatery svajoj znajomaj pa vulicy Skrypnikava ŭ Minsku schapiŭ jaje sabaku i vykinuŭ praz akonnuju ramu. U toj momant jon znachodziŭsia na kuchni razam ź siabram, ź jakim raśpivaŭ śpirtnyja napoi. Haspadynia hadavanca znachodziłasia ŭ inšym pakoi.

Sa słoŭ padślednaha, jaho razzłavała, što ščaniuk sprabavaŭ pryciahnuć da siabie ŭvahu: pieryjadyčna brachaŭ i skuholiŭ, z-za hetaha mužčyna vyrašyŭ pazbavicca ad žyvioły.

Na vulicy vidavočcami taho, što zdaryłasia, stalisia niekalki mužčyn. Jany pačuli brech sabaki, jaki danosiŭsia ź vierchnich pavierchaŭ. Potym jany ŭbačyli, što jaje kinuli z vakna. Nieabyjakavyja hramadzianie padyšli da žyvioły, adnak dapamahčy jamu ŭžo nie mahli. Pabačyŭšy, što ščaniuk pamier, jany vyklikali milicyju.

Raniej abvinavačany pryciahvaŭsia da kryminalnaj adkaznaści za karyślivyja złačynstvy, nidzie nie pracuje, pa miescy žycharstva charaktaryzujecca admoŭna. U chodzie śledstva mužčyna pryznaŭsia ŭ zroblenym i raskajaŭsia.

Artykuł 339-1 (žorstkaje abychodžańnie z žyviołaj, jakoje paciahnuła jaje hibiel, ździejśnienaje z chulihanskich i inšych nizinnych padachvočvańniaŭ) Kryminalnaha kodeksa RB praduhledžvaje pakarańnie štrafam, aryštam albo pazbaŭleńnie voli na termin da 1 hoda.