Supracoŭniki MNS vyratavali žyćcio žurnalistu Vadzimu Kaznačejevu
08.01.2018 / 21:12
Viečaram 7 studzienia adbyŭsia pažar na praśpiekcie Niezaležnaści ŭ Minsku. U 20:47 pažarnyja atrymali vyklik ad susiedziaŭ ab uzharańni, užo 21:09 pažar byŭ likvidavany.
Fota mchs.gov.by.
Hareła kvatera viadomaha žurnalista i publicysta Vadzima Kaznačejeva. Jamu 53 hady, u rozny čas Vadzim supracoŭničaŭ z šmatlikimi biełaruskimi i zamiežnymi vydańniami.
Kaznačejeva znajšli biesprytomnaha na padłozie na kuchni. Jaho dastavili ŭ balnicu z dyjahnazam «ciažkaja termainhalacyjnaja traŭma, apiok dychalnych šlachoŭ, atručvańnie praduktami hareńnia».
Vadzim Kaznačejeŭ. Fota z facebook.com.
U ofisie AHP, siabram jakoj źjaŭlajecca Vadzim, nam paviedamili, što spačatku Kaznačejeŭ znachodziŭsia ŭ reanimacyi apiokavaha adździaleńnia balnicy chutkaj dapamohi, adnak u druhoj pałovie dnia jaho płanavali pieravieści prosta ŭ adździaleńnia. Žurnalist u prytomnaści.
«Nam skazali, što pahrozy žyćciu niama. Ciapier jamu možna adnosić soki, vadu biez haza, supy, piure», — skazała pres-sakratar AHP Hanna Krasulina.
MNS paviedamlaje, što pryčyny ŭzharańnia daśledujucca. Adna ź viersij — nieaściarožnaść paciarpiełaha pry kureńni.