Baksior, santechnik — što viadoma pra Śviatasłava Baranoviča, jaki adbivaŭ demanstrantaŭ u ahientaŭ u cyvilnym
07.02.2018 / 15:23
U pačatku kastryčnika 31-hadovy žychar Minska Śviatasłaŭ Baranovič źnik. Svajaki adšukali jaho tolki praź niekalki dzion. Chłopiec byŭ na Vaładarcy.
Vyśvietliłasia, što Śviatasłava zatrymali 2 kastryčnika za toje, što jon adbivaŭ demanstrantaŭ ad ahientaŭ u cyvilnym padčas «Marša niedarmajedaŭ» 15 sakavika.
Ciapier Baranovič čakaje suda. Pieršapačatkova na jaho zaviali spravu za «chulihanstva», a paźniej pierakvalifikavali abvinavačvańnie na bolš surjozny artykuł — «hvałt u dačynieńni da supracoŭnika orhanaŭ unutranych spraŭ». Ciapier Baranoviču pahražaje pazbaŭleńnie voli na termin da šaści hadoŭ.
Śviatasłaŭ Baranovič naradziŭsia ŭ 1986 hodzie ŭ vioscy Kavali Vilejskaha rajona (Naračanskaha sielsavieta, bo ŭsiaho ŭ rajonie Kavaloŭ dvoje).
Siamja vialikaja: Śviatasłaŭ — małodšaje, šostaje dzicia ŭ siamji. Baćka i maci pracavali ŭ kałhasie, jon traktarystam, jana — dajarkaj.
Ciapier u Kavalach zastałasia tolki maci. Jaje muž pamior, pamierli i dvoje synoŭ. Astatnija raźjechalisia. Starejšy syn pracuje traktarystam u miascovym kałhasie, ale žyvie ŭ susiedniaj vioscy. Dźvie dački žyvuć u Maładziečnie i Minsku. Śviatasłaŭ taksama pierabraŭsia ŭ stalicu. U Kavalach jon byvaje redka.
«Ja i nie viedaju, što tam ź im. Ci žyvy? Ci dačakajusia ja jaho?» — kaža maci.
Paśla škoły Baranovič skončyŭ PTV u Puchavickim rajonie, dzie atrymaŭ śpiecyjalnaść santechnika. Zatym Śviatasłaŭ pierajechaŭ u Minsk. Tut jon pracavaŭ budaŭnikom. A ŭ apošni čas Baranovič sprabavaŭ zaniacca biznesam. Praŭda, ciapier hetaja sprava zamaroziłasia, bo Śviatasłaŭ za kratami.
Taksama Baranovič zajmaŭsia boksam. Darečy, u dzień, kali jon zastupiŭsia za demanstrantaŭ, na im była čyrvonaja spartovaja kurtka z nadpisam «biełaruski boks».
Taja samaja bojka ź milicyjantami ŭ sakaviku 2017 hoda
Baranoviča nie pieršy raz pryciahvajuć da adkaznaści za hramadskuju aktyŭnaść. Jaho sudzili za ŭdzieł u Płoščy-2010. Chłopca zatrymali adnym z apošnich, 15 červienia 2011 hoda.
A 12 kastryčnika 2011 hoda sudździa Maskoŭskaha rajona Minska Alena Rudnickaja pakarała Śviatasłava tryma hadami «chatniaj chimii». Sudździa patłumačyła heta najaŭnaściu źmiakčajučych abstavin — maładoha ŭzrostu (chłopcu było ŭsiaho 25 hadoŭ) i najaŭnaści ŭ jaho miesca pracy.
Darečy, u 2011 hodzie pravaabaroncy pryznavali Baranoviča palitviaźniem. Sioleta, chutčej za ŭsio, hetaha nie budzie, bo jaho buduć sudzić za hvałtoŭnyja dziejańni — chiba tolki paśla źviernuć uvahu na niepraparcyjna žorstkaje pakarańnie (kali jano budzie takim).
Śviatasłaŭ Baranovič užo niekalki miesiacaŭ znachodzicca pad vartaj. Miesiac jaho trymali ŭ Navinkach — jon byŭ tam na ekśpiertyzie, raspaviadała siastra Natalla «Radyjo Svaboda».
«U jakim jon stanie, mnie dakładna nieviadoma, bo za hety čas spatkańniaŭ nie davali. Advakat kaža, što nie skardzicca», — kazała Natalla.
Pa jaje słovach, Śviatasłaŭ pryznaŭ vinu — na videa dobra bačna, jak jon bje ludziej u cyvilnym.
«Ciapier jamu pahražaje realny termin, ale my ŭsie spadziajemsia na lepšaje», — kaža siastra.
Sud nad Śviatasłavam Baranovičam pačniecca 15 lutaha. Praces adbudziecca ŭ sudzie Maskoŭskaha rajona Minska.
Vyrašać los Baranoviča budzie sudździa Śviatłana Bandarenka. Adna z najbolš viadomych spravaŭ apošniaha času, jakija razhladała Bandarenka — sud nad Uładzimiram Kondrusiem, jašče adnym udzielnikam Płoščy-2010. Tady jana pakarała Kondrusia «chatniaj chimijaj», prysud byŭ miakčejšy, čym prasiŭ prakuror.