NASA adkłała zapusk samaha vialikaha ŭ historyi kaśmičnaha teleskopa na 2 hady
Zapusk kaśmičnaj absiervatoryi «Džejms Ueb», samaha vialikaha i darahoha prajekta NASA, byŭ aficyjna adkładzieny da traŭnia 2020 hoda praź niepradbačanyja prablemy pry zborcy i testavańni teleskopa, paviedamlajecca na aficyjnym sajcie amierykanskaha kaśmičnaha ahienctva.
29.03.2018 / 21:14
Pieršapačatkova novy aparat płanavałasia zapuścić ŭ 2014 hodzie, ale praźmierna vysokija zatraty na jaho pabudovu i adstavańnie ad hrafika vymusili NASA pieranieści mierkavanuju datu startu misii spačatku na vierasień 2015 hoda, potym — na kastryčnik 2018 hoda, a zatym — i na lipień 2019 hoda. Kanhres ZŠA nieadnarazova sprabavaŭ zakryć prajekt praz zatrymki ŭ jahonaj zborcy i vychad za miežy biudžetu.
U pačatku śniežnia 2016 hoda inžyniery NASA zajavili ab mahčymym źjaŭleńni vialikich prablem u «Džejmsa Ueba»: aksieleromietry, ustalavanyja na korpusie teleskopa, zafiksavali anamalii padčas vibracyjnych testaŭ, što prymusiła NASA pravieści detalovuju pravierku teleskopa.
Hetyja prablemy i inšyja niepaładki ŭ pracy soniečnaha ekrana teleskopa «źjeli» usie reziervovyja zapasy času, jakija byli vyłučanyja na pabudovu i pravierku teleskopa ŭ ramkach apošniaj viersii płanaŭ NASA, źviazanaj ź jaho zapuskam letam 2019 hoda. U pačatku sakavika ŭ NASA zajavili, što heta moža prymusić ahienctva pieranieści zapusk na 2020 hod. 28 sakavika 2018 hoda heta pacvierdziłasia.
«Uličvajučy toje, jak šmat resursaŭ i času i NASA, i našy mižnarodnyja partniory ŭkłali ŭ hety prajekt, my płanujem adsunuć čas zapusku i vykarystoŭvać čas dla taho, kab sistematyčna pravieści ŭsie testy, jakija jašče treba pravieści. My spadziajemsia, što budziem hatovyja da zapusku ŭ traŭni 2020 hoda», — zajaviŭ Tomas Curbuchien, namieśnik kiraŭnika navukovaha padraździaleńnia NASA.
Novy teleskop «Džejms Ueb» (James Webb Space Telescope) pavinien stać aficyjnaj zamienaj dla arbitalnaj absiervatoryi «Chabł», jakaja pracuje na arbicie ŭžo 25 hadoŭ.