Lenta.ru: Беларускія алігархі зарабляюць мільёны даляраў на кантрабандзе ў Расію
Папулярнае расійскае інтэрнэт-выданне Lenta.ru апублікавала матэрыял «Беларускі паток», у якім сцвярджае, што праз Беларусь у Расію арганізавана кантрабанда еўрапейскіх тавараў. Адметна, што спасылка на гэты артыкул у адрасным радку браўзера змяшчае словы «bulbash_empire».
14.06.2018 / 06:08
Расійскае выданне сцвярджае, што беларуская кантрабанда рынула ў Расію адразу пасля падзення СССР. У пачатку 90-ых, маўляў, нармальнай граніцы яшчэ не было, а ў 1995 годзе беларуска-расійская граніца была цалкам ліквідаваная.
Паводле Lenta.ru, Расія апошнія 23 гады фактычна і юрыдычна ніяк не кантралюе тысячу кіламетраў мяжы на захадзе (гаворка пра мяжу Беларусь-ЕС). Гэтую функцыю выконваюць мытныя і памежныя ведамствы Беларусі.
Выданне сцвярджае, што пік кантрабандных паставак быў дасягнуты з 2014 года. Журналіст прыводзіць наступныя даныя:
«У 2013 годзе Польшча экспартавала ў Расію 751 тысячу тон яблыкаў. Пасля ўвядзення эмбарга гандаль абваліўся. Аднак польскі экспарт у Беларусь рэзка вырас — са 153 тысяч тон у 2013-м да 550 тысяч тон у 2016 годзе. Ці магло так рэзка вырасці спажыванне польскіх яблыкаў у Беларусі — пытанне рытарычнае».
Пазней Беларусь стала экспарцёрам і больш экзатычных тавараў.
Дайшло да таго, піша Lenta.ru, што супрацоўнікі ФСБ Расіі пачалі знаходзіць нелегальныя падпольныя аўтадарогі, збудаваныя адмыслова для кантрабанды еўрапейскіх прадуктаў з Беларусі.
Беларускія ўлады адмаўляюць, што кантрабанда мае дзяржаўны характар, але расійскія журналісты ўпэўненыя, што гэта не так. Беларусь — аўтарытарная краіна, Лукашэнка кантралюе ўсе сілавыя структуры ў краіне, таму ўсё адбываецца з яго ведама.
Расійскае выданне піша пра цэлыя лагістычныя цэнтры ў Беларусі, якія нібыта займаюцца пераробкай сертыфікатаў якасці ў прамысловых маштабах. Такія цэнтры забяспечваюць легалізацыю санкцыйных тавараў.
Як сцвярджае намеснік дэкана факультэта сусветнай палітыкі Вышэйшай школы эканомікі Андрэй Суздальцаў, які жыў у Беларусі з 1993 па 2006 год, пакуль не быў дэпартаваны з краіны, арганізацыяй кантрабандных паставак займаюцца беларускія алігархі, якія, па ягоным меркаванні, знаходзяцца пад поўным кантролем беларускіх улад.
Варта адзначыць, што Мінск не раз абвяргаў абвінавачванні ў кантрабандзе. У той жа час Беларусь рашуча адстойвае сваё права на свабоду гандлю з трэцімі краінамі. Да прыкладу, Беларусь закупляе рыбную сыравіну і вырабляе з яе прадукты ў тым ліку для расійскага рынку.