Nastaŭnica hieahrafii z Babrujska papularyzuje biełaruskuju movu praź instahram. A sama praktykujecca ŭ maŭleńni z katom!
Babrujčanka Darja Roskač pracuje nastaŭnicaj hieahrafii ŭ škole №25 svajho rodnaha horada. Škoła choć i ruskamoŭnaja, ale dziaŭčyna imkniecca pierachodzić na biełaruskuju ŭ luby mahčymy momant. Viadzie pa-biełarusku jana i svaje sacsietki.
20.06.2018 / 11:14
Darja Roskač.
Darja skončyła Biełaruski piedahahičny ŭniviersitet imia M. Tanka pa śpiecyjalnaści «hieahrafija i achova pryrody». Pa raźmierkavańni trapiła na pracu ŭ Babrujsk. U piedahahičnuju VNU dziaŭčyna išła metanakiravana, i maci-inžynierka z baćkam-elektrykam jaje vybaru nie piarečyli.
«Knižki pa hieahrafii choć i nadrukavanyja pa-rusku, ale ja prapanoŭvaju na dobraachvotnaj asnovie adkazvać pa-biełarusku. Za heta dzieci mohuć atrymać bonusy. Kali prachodzim hieahrafiju Biełarusi, mahu raskazvać materyjał na rodnaj movie. Ci kali havorka idzie pra niešta z našaj krainaj źviazanaje: naprykład, pra haru Kaściuški ŭ Aŭstralii, jakaja była nazvanaja ŭ honar Tadevuša Kaściuški», — raskazvaje Darja.
Nastaŭnica ličyć, što bolšaść dziaciej nie razumieje, navošta im biełaruskaja i jakim čynam mova spatrebicca im u budučyni, tamu i adnosiny da jaje pahardlivyja. «Niama prykładu cikaŭnaści da biełaruskaj z boku dziaržavy», — dadaje Darja. Ale ŭ bolšaj stupieni, upeŭnienaja jana, situacyja zaležyć ad vychavańnia ŭ siamji:
«Budučy ŭžo darosłaj, ja analizuju, jak u majo žyćcio pryjšła biełaruskaja mova. Babrujsk ža pieravažna ruskamoŭny. Ale ja ŭryŭkami pamiataju, jak mnie ź dziacinstva pryvivałasia luboŭ da svajho, rodnaha. Baćka byŭ rodam ź vioski, i, dziakujučy jamu, ja išła ŭ pieršy kłas, viedajučy, jak pišacca biełaruskaja litara «i», a astatnija dzieci nie viedali hetaha. I pastupova, pad apošnija kursy ŭniviera, heta nacyjanalnaje ŭva mnie ŭmacavałasia».
Pačynać adnosiny ź biełaruskaj movy Darja raić chacia b z banalnaha «dziakuj» i «kali łaska» ŭ adkaz ludziam u kramach, na vulicy i hetak dalej. Sama jana, kali pobač niama nikoha, z kim možna było b papraktykavacca ŭ havorcy, razmaŭlaje pa-biełarusku sa svaim katom.
Zamacavanym dopisam va Ukantakcie ŭžo nie pieršy hod u dziaŭčyny visić vykazvańnie Vacłava Łastoŭskaha: «Chto saromiejecca svajoj movy, varty taho, kab i jaho dobryja ludzi saromielisia, jak vyradka, kab im pahardžali, jak niedaludkam, bo, saromiejučysia rodnaje movy, jon kryŭdzić nie tolki dziadoŭ — baćkoŭ svaich, ale i ŭvieś narod».
Instahram jana taksama viadzie pa-biełarusku, kab vučni, nastaŭniki i inšy ludzi viedali jaje pazicyju: «Chaj dzieci bačać movu chacia b u maich sacsietkach i takim čynam razumiejuć, što joj možna karystacca nie tolki na zaniatkach pa biełaruskaj movie i litaratury».
Administracyja škoły, kaža Darja, z parazumieńniem stavicca da jaje pazicyi. Tym bolš što maładaja nastaŭnica pryŭnosić u škołu šmat novaha.
Tak, naprykład, pa jaje inicyjatyvie ŭ škole zapracavaŭ hurtok «Juny režysior». I kali na niekatoryja inšyja hurtki dziaciej davodziłasia zaprašać doŭha i nastojliva, to siudy školniki chodziać z entuzijazmam. Darja zaviała dla škoły asobny jutub-kanał, na im možna ŭbačyć uvieś kantent, zrobleny maładymi režysiorami.
Akramia nastaŭnickaj dziejnaści, Darja zajmajecca kalekcyjanavańniem niezvyčajnych lalek (dla jakich sama pierašyvaje adzieńnie), maluje i fatahrafuje.
«Ja maru, što adnojčy prafiesija nastaŭnika zdabudzie prestyžny status siarod hramadstva. A kali kazać pra instahram… Budu i dalej publikavać fota i dumki na rodnaj movie, bo jana samaja lepšaja i samaja žyvaja, što b chto ni kazaŭ».