Jak zarehistravać dzicia: pamiatka dla maładych baćkoŭ

Małoje naradziłasia, i voś vy ŭžo ŭ novym składzie viartajeciesia dadomu. Ciapier nieabchodna pakłapacicca pra pieršyja dakumienty dziciaci.

02.01.2022 / 21:37

Pieršyja daviedki vy atrymajecie jašče ŭ raddomie:

1. Daviedka, dzie buduć paznačany čas, data i miesca naradžeńnia, proźvišča, imia i imia pa baćku maci, poł (spatrebicca dla atrymańnia paśviedčańnia ab naradžeńni).
2. Zaklučeńnie ab stanie zdaroŭja dziciaci, jakuju nieabchodna pieradać u dziciačuju palikliniku praz doktara abo patranažnuju miedsiastru, jakaja pryjdzie adviedać na 1-2 dzień paśla vypiski.
3. Zaklučeńnie ab stanie zdaroŭja maci. Praz dva tydni jaho treba adnieści ŭ palikliniku, dzie vy stajali na ŭliku pa ciažarnaści, vas ahledziać i skažuć, kali pryjści pa daviedku «Ab pastanoŭcy na ŭlik da 12 tydniaŭ» (kali vy tak zrabili, jaje zmoža zabrać muž).

Etap pieršy: paśviedčańnie ab naradžeńni.

Zarehistravać dzicia možna ŭ ZAHSie pa miescy jaho naradžeńnia abo pa miescy žycharstva maci ci baćki.

Maksimalny termin padačy ŭ ZAHS zajavy na rehistracyju — try miesiacy z dnia naradžeńnia dziciaci. Maksimalny termin vydačy paśviedčańnia ab naradžeńni — try dni.

Isnuje pracedura ŭračystaj rehistracyi małoha. Dla hetaha papiarednie źviarniciesia ŭ ZAHS.

Jakija dakumienty zachapić u ZAHS?

• daviedku ź miedycynskaj ustanovy ab naradžeńni dziciaci (jaje atrymali ŭ raddomie pry vypiscy);
• pašparty baćkoŭ;
• paśviedčańnie ab šlubie;
• paśviedčańni ab naradžeńni baćkoŭ;
• zajava baćkoŭ.

Kali vy znachodziciesia ŭ šlubie, dakumienty moža prynieści i niechta adzin z vas. U hetym vypadku baćka i maci zapisvajucca baćkami hetaha dziciaci, u pašparty staviacca adpaviednyja štampy. Źviestki pra maci zapisvajucca ź miedycynskaj daviedki, vydadzienaj u raddomie, pra baćku — z paśviedčańnia ab šlubie. Pry rehistracyi naradžeńnia dziciaci jaho proźvišča zapisvajecca pa proźviščy baćkoŭ. A voś imia — pa ahulnym žadańni baćkoŭ.

Kali baćki nie znachodziacca ŭ šlubie, to prysutničać u ZAHSie nieabchodna budzie razam. U hetym vypadku źviestki pra baćku buduć zapisany na padstavie akta ab vyznačeńni baćkoŭstva abo pa zajavie maci (kali baćkoŭstva nie vyznačana). Pa žadańni maci źviestki pra baćku mohuć i nie zapisvacca.

U situacyi, kali adsutničaje sumiesnaja zajava muža i žonki abo rašeńnie suda ab vyznačeńni baćkoŭstva, to zapis pra baćku robicca pa proźviščy maci, a imia i imia pa baćku — pa ŭkazańni maci.

Takim čynam, z ZAHSa vy viartajeciesia z paśviedčańniem ab naradžeńni i daviedkaj dla atrymańnia adnarazovaj materyjalnaj dapamohi.

Što rabić, kali niama daviedki z raddoma?

Siońnia vialikuju papularnaść nabyvajuć rody ŭ chatnich umovach. Adpaviedna, nieabchodnaja dla rehistracyi dziciaci ŭ ZAHSie daviedka z raddoma adsutničaje.

U takim vypadku nieabchodna źviarnucca ŭ ZAHS, dzie baćkam daduć daviedku-admovu ŭ rehistracyi dzicia biez najaŭnaści naležnych dakumientaŭ. Z hetaj daviedkaj nieabchodna pryjści ŭ miascovy sud i napisać zajavu ab vyznačeńni fakta naradžeńnia dziciaci ŭ sudovym paradku.

Abaviazkova spatrebicca śviedka.

Akramia hetaha, nieabchodna budzie pradastavić abmiennuju kartu z žanočaj kansultacyi (kali žančyna tam nazirałasia) i daviedku ad doktara pra toje, što žančyna naradziła dzicia.

Paśla suda baćki atrymajuć pastanovu suda ab ustanaŭleńni fakta naradžeńnia, ź jakaj treba znoŭ źviarnucca ŭ ZAHS — pastanova stanie zamienaj daviedki z raddoma. Astatniaja častka pracedury — jak i ŭ vypadku naradžeńnia dzicia ŭ raddomie.

Etap druhi: rehistracyja dzicia pa miescy žycharstva (prapiska).

Zhodna ź biełaruskim zakanadaŭstvam, niepaŭnaletnija, jakija jašče nie dasiahnuli čatyrnaccaci hadoŭ, rehistrujucca pa miescy žycharstva/znachodžańnia abaich baćkoŭ ci adnaho ź ich abo ich zakonnych pradstaŭnikoŭ. Novanarodžany rehistrujecca tolki razam z kim-niebudź z baćkoŭ. Rehistracyja ažyćciaŭlajecca biez zhody ŭłaśnika abo najmalnika žyłoha pamiaškańnia.

Pracedura prapiski prachodzić u pašpartnym stale RDC (raźlikova-daviedačny centr) abo ŽES.

U pašpartny stoł nieabchodna pradastavić nastupnyja dakumienty:

• zajava ab rehistracyi pa miescy žycharstva;
• paśviedčańnie ab naradžeńni dziciaci;
• pašparty baćkoŭ;
• paśviedčańnie ab šlubie;
• kopii asabovych rachunkaŭ baćki i maci, kali ŭ baćkoŭ roznaja prapiska (lepš zachapić niekalki asobnikaŭ).

U pašpartnym stale RDC (ŽES) pavinny prysutničać aboje baćkoŭ. Pra varyjant najaŭnaści tolki adnaho z baćkoŭ lepš zahadzia spytać u RDC (ŽES).

Baćki prapisany ŭ roznych miescach: što rabić?

U takoj situacyi nieabchodna pradastavić daviedku ź inšaha RDC pra toje, što dzicia tam nie zarehistravana, i zajavu ad adnaho z baćkoŭ, što jon (jana) nie suprać rehistracyi pa miescy žycharstva žonki (muža).

Dla padstrachoŭki vaźmicie dźvie daviedki z ŽESa prapiski mamy i ŽESa prapiski taty.

Paśla ŭsich pracedur vy atrymajecie daviedku ab miescy žycharstva i składzie siamji.

Etap treci: materyjalnaja dapamoha.

U Biełarusi pry naradžeńni dziciaci vydajuć dapamohu troch vidaŭ:

1. Adnarazovaja ŭ suviazi z naradžeńniem dziciaci (10 bazavych materyjalnych dapamoh (BMD) pry naradžeńni pieršaha i 14 BMD pry naradžeńni druhoha i nastupnych dziaciej).
2. Adnarazovaja dapamoha žančynam, jakija stali na ŭlik u dziaržaŭnych arhanizacyjach achovy zdaroŭja da 12-tydniovaha terminu ciažarnaści (100% BMD).
3. Dapamoha pa dohladzie za dziciaci da 3-ch hadoŭ (35% ad siaredniaj zarpłaty za kvartał na pieršaje dzicia i 40% — na druhoje i nastupnych).

Z dakumientami (pašpart, daviedka ab naradžeńni dziciaci z ZAHSa, daviedka ab miescy žycharstva i składzie siamji z ŽESa, miedycynskaja daviedka ab pastanoŭcy na ŭlik da 12-ci tydniaŭ z žanočaj kansultacyi) źviartajciesia ŭ buchhałteryju pa miescy pracy abo navučańnia. 

Karysnyja parady

• Zrabicie adrazu niekalki kopij usich dakumientaŭ (pašpartoŭ baćkoŭ, paśviedčańnia ab šlubie, paśviedčańnia ab naradžeńni dziciaci), a paśla prapiski dziciaci vaźmicie ŭ RDC (ŽES) niekalki daviedak ab miescy žycharstva i składzie siamji. Jany spatrebiacca pry afarmleńni dakumientaŭ na dapamohu i pastanoŭki na čarhu ŭ dziciačy sad.
• Źviarnicie ŭvahu na čas pracy ZAHSa. Zvyčajna niadziela i paniadziełak — heta vychadnyja, piatnica i subota — dni viasiellaŭ. Tamu lepš tudy iści ŭ mieniej zahružanyja dni — aŭtorak, sieradu i čaćvier.

Afarmlajcie vašych dzietak chutka, prosta i bieź niervaŭ!

Nastaśsia Śmirnova