Дзе і як утылізаваць бытавыя прыборы ў Мінску
Сучасны чалавек не ўяўляе свайго жыцця без электроннай тэхнікі і электрапрыбораў. Штогод колькасць самых разнастайных гаджэтаў і «памагатых у побыце» толькі павялічваецца. Пагоня ж за новым дызайнам і ўдасканаленымі тэхналогіямі нярэдка скарачае іх тэрмін службы. Таму пытанне, што рабіць з сапсаванымі альбо «маральна састарэлымі» мабільным тэлефонам, лядоўняй, пральнай машынкай, электрачайнікам і як правільна ўтылізаваць такога роду тэхніку, рана ці позна паўстае перад кожным.
17.08.2018 / 11:23
Для жыхароў Мінска вырашэнне ўсіх гэтых пытанняў не ўяўляе вялікай праблемы. У сталіцы створаны спрыяльныя ўмовы для таго, каб непатрэбная электронная тэхніка і электрапрыборы патрапілі не ў кантэйнер для смецця, а былі ўтылізаваныя належным чынам.
Бытавую тэхніку можна здаць у некаторыя пункты прыёму другаснай сыравіны (з адным са спісаў можна азнаёміцца тут). А можна скарыстацца паслугамі арганізацый, якія спецыялізуюцца на скупцы, перапрацоўцы і ўтылізацыі электрапрыбораў і электроннай тэхнікі і маюць ліцэнзію на працу з каштоўнымі металамі. Дарэчы, каштоўныя металы, здабытыя ў працэсе перапрацоўкі, папаўняюць Дзяржфонд Беларусі.
На гэты момант у Мінску працуюць дзве арганізацыі, якія прымаюць бытавую тэхніку ад насельніцтва. Спектр прапанаваных імі паслуг і расцэнкі фактычна не адрозніваюцца. Можна самастойна прывезці тэхніку ў пункт прыёму і атрымаць за яе грошы. А можна замовіць бясплатны вываз буйнагабарытнай тэхнікі з кватэры, дому, гаража (грашовае ўзнагароджанне ў такім выпадку не прадугледжана). Адпаведна выбар, куды звярнуцца, каб пазбавіцца ад непатрэбнай тэхнікі, залежыць толькі ад уласных пераваг і месцазнаходжання пунктаў прыёму.
ААТ«БелВТІ»
Пункт прыёму: вул. Славінскага, 1.
Гадзіны працы: панядзелак — пятніца з 8.00 да 20.00, субота — з 8.00 да 17.00 (без перапынку на абед)
Кантактныя тэлефоны: +375 17 369 83 63, +375 17 369 83 23, +375 29 626 88 57
Арганізацыя ажыццяўляе:
- Прыём тэхнікі ад насельніцтва за грошы пры ўмове самастойнай дастаўкі тэхнікі ў пункт прыёму. Грашовая ўзнагарода — ад 20 капеек за кг (абавязковая ўмова — тэхніка павінна быць камплектнай і ўтрымліваць асноўныя часткі — рухавік, кампрэсар і г.д.).
Расцэнкі на асобныя віды электроннай тэхнікі (смартфоны, сістэмныя дыскі, ноўтбукі і г. д.) вышэйшыя. З прэйскурантам цэн можна азнаёміцца на сайце.
Важна: для атрымання грашовай выплаты пры сабе неабходна мець пашпарт.
- Бясплатны вываз буйнагабарытнай тэхнікі (у Мінску і Мінскім раёне) без выплат за тэхніку.
Каб скарыстацца дадзенай паслугай, трэба пазваніць на кароткі нумар 7383 альбо па тэлефонах +375 17 369 83 23; +375 17 369 83 63, +37529 626 88 57. Можна таксама пакінуць анлайн-заяву. У заяве неабходна ўказаць раён горада, адрас, кантактны тэлефон, від і колькасць тэхнікі, прозвішча, імя і імя па бацьку.
Вываз тэхнікі адбываецца пасля таго, як па раёне назбіраецца неабходная колькасць заявак. Супрацоўнікі прадпрыемства самі вынесуць тэхніку і пагрузяць яе.
ТАА «РэсайклПро»
Пункты прыёму: пр-т Партызанскі 2/4, вул. Лынькова 125
Гадзіны працы: панядзелак — пятніца з 8.30 да 17.00
Кантактныя тэлефоны: +375 29 110 33 04, +375 17 388 28 60
Арганізацыя ажыццяўляе:
- Прыём тэхнікі ад насельніцтва за грошы — ад 20 капеек за кг (пры наяўнасці ўсіх складовых частак прыстасавання і самастойнай дастаўцы тэхнікі ў пункт прыёму).
Расцэнкі на электронны лом і радыёэлементы могуць быць значна большымі і адрозніваюцца ў залежнасці ад віду дэталяў (з прэйскурантам можна азнаёміцца на сайце)
Важна: пры здачы электроннага лому неабходна прад’явіць пашпарт.
- Бясплатны вываз буйнагабарытнай тэхнікі без выплат за тэхніку.
Замовіць бясплатны вываз можна, пакінуўшы адпаведную анлайн-заяву на сайце альбо па тэлефонах: +375 29 392 14 92 (Velcom / Viber), +375 17 388 28 60 (гарадскі).
Заявы прымаюцца цягам працоўнага тыдня з панядзелка па пятніцу з 8.30 да 17.00. Служба вывазу працуе з панядзелка па пятніцу з 9.00 да 20.00. Вынас тэхнікі і яе пагрузка ажыццяўляюцца супрацоўнікамі самастойна.
Утылізуйце непатрэбную бытавую тэхніку правільна і памятайце, што гэта ўклад не толькі ў нашае сёння, але і ў будучыню.