Na kursy ŭkrainskaj movy ŭ Minsku zapisałasia 80 čałaviek
20.10.2018 / 20:31
U piatnicu ŭ Minsku pačaŭsia druhi siezon kursaŭ ukrainskaj movy. Try hrupy zajmajucca ŭ dvuch pamiaškańniach:
18.00 — u Respublikanskim centry nacyjanalnych kultur (Čyčeryna, 19) — hrupa pačatkoŭcaŭ
18.00 — u Tavarystvie biełaruskaj movy (Rumiancava, 13) — hrupa pačatkoŭcaŭ
19.30 — u Tavarystvie biełaruskaj movy (Rumiancava, 13) — hrupa tych, chto praciahvaje vyvučać movu. Bolšaść studentaŭ tut chodziać druhi hod.
Pačatkoŭcy pačali z vyvučeńnia litar i vitańniaŭ, studenty-druhakurśniki — z praktykavańniaŭ pa nacisku i vusnaha zadańnia ŭ małych hrupach: abmiarkoŭvali prafiesii i zarobki.
Ciapier na kursach troje vykładčykaŭ: fiłołah i žurnalist z Ukrainy Aksana Ciplićka, biełaruski fiłołah-ukrainist z ukrainskimi karaniami Volha Barysienka i Jahor Dziobyk, biełaruski fiłołah-ukrainist, jaki ciapier vykładaje biełaruskuju movu ŭ Łucku va Uschodniejeŭrapiejskim univiersitecie imia Lesi Ukrainki. Volha i Jahor buduć čarhavacca.
Vykładčyki pracujuć na vałanciorskich pačatkach.
«Hrupy dastatkova vialikija, i ludzi ŭsio jašče zapisvajucca, u nastupnuju piatnicu dałučacca i novyja studenty. Tamu, kaniečnie, chaciełasia b padzialić hrupy, — kažuć arhanizatary. — Ale dla hetaha treba jašče adzin vykładčyk. My jaho aktyŭna šukajem».
Pačatkoŭcy raskazali, što pryviało ich na kursy. Niechta maje ŭkrainskija karani i choča viedać movu prodkaŭ. U niekaha znajomyja va Ukrainie («Kali maje ŭkrainskija siabry vyvučyli biełaruskuju movu, mnie stała soramna, tamu ja siońnia i pryjšoŭ», — padzialiŭsia student-histfakaviec). Kamuści ŭkrainskaja patrebnaja dla raboty. Bolšaść, adnak, prosta choča adčuvać siabie ŭ svajoj talercy, kali byvaje va Ukrainie: «Chaču razmaŭlać z ukraincami na ich movie».
Hrupa pačatkoŭcaŭ z Centra nacyjanalnych kultur. Studentaŭ vitaje pasoł Ukrainy
Adkryćcio hrupy dla pačatkoŭcaŭ u Respublikanskim centry nacyjanalnych kultur. Ansambl choru ŭkrainskaj pieśni «Krynica» praśpiavaŭ «Oj zielenie žito zielenie, chorošiji hosti u mienie». Ansambl śpiavaje cudoŭna, ale ŭkrainskaja muzyka zaraz pieražyvaje taki roskvit, što na aficyjnych mierapryjemstvach z poŭnym pravam moža hučać i «Akijan Elzy», i pieśni hurtu «KAZKA». Jany słuchalisia b nie mienš čaroŭna, ale prezientavali b Ukrainu bolš sučasna.
Pasoł pryvitaŭ vykładčycu pani Volhu, jakaja troški spaźniłasia: «Ja vybačajusia, što ŭziaŭ słova biez Vašaha dazvołu, ja pasoł Ukrainy, časam dazvalaju sabie takuju volnaść».
Druhakurśniki ŭ TBM. Fota Śviatłany Kavalenka.
Kursy skončylisia a 21-j. Dziažurnych u TBMie ŭžo nie było. Pravodzić studentaŭ i začynić ofis pryjšła staršynia TBM i deputatka Pałaty pradstaŭnikoŭ Alena Anisim.