U minskim šmatpaviarchoviku 12-hadovuju dziaŭčynku pakusaŭ pacuk
U padjeździe šmatpaviarchovika ŭ 2-m zavułku Bahracijona, 19, dzicia pakusaŭ pacuk. Ciapier dziaŭčynka ŭ lakarni, dzie prachodzić kurs pryščepak ad šalenstva, piša Tut.by. Pra toje, jak heta adbyłosia, raspaviadajuć baćki.
28.10.2018 / 10:27
Uviečary ŭ piatnicu, 26 kastryčnika, 12-hadovaja dziaŭčynka viartałasia dadomu sa škoły. Na vośmym paviersie, vyjšaŭšy ź lifta, jana ŭbačyła pacuka, jaki vylez sa śmiećciepravoda. Školnica padyšła da jaho ź cikaŭnaści, a pacuk skoknuŭ na dzicia i ŭkusiŭ za palec.
Baćka paciarpiełaj dziaŭčynki Siarhiej kaža, što paśla ŭkusu pacuka dačka spałochałasia i niekalki hadzin nie raspaviadała baćkam pra toje, što adbyłosia. Kali darosłyja ŭsio ž daviedalisia, što zdaryłasia, ranicaj pavieźli jaje ŭ špital. Ciapier dziaŭčynka prachodzić kurs pryščepak ad šalenstva, jaki raściahniecca na 90 dzion.
«Prytym jašče za niekalki dzion da hetaha było niekalki vypadkaŭ, kali pacuki biehali pa pavierchach. Bolš za toje, susiedzi štuki čatyry sami zabili», — kaža Siarhiej.
Pavodle jaho słoŭ, pacuki padymajucca na vierchnija pavierchi mienavita pa śmiećciepravodzie.
«Šmat razoŭ źviartalisia ŭ ŽES, apošni — litaralna za dva ci try dni da hetaha vypadku. Jany praviali niejkuju sprobu dezynfiekcyi. Ale pacuki ŭ nas va ŭsim domie ŭžo niekalki hadoŭ, susiedzi dva hady pišuć i prosiać što-niebudź zrabić. Ale ničoha nie robicca. Jak bačycie, dajšło da taho, što pacuki pačali napadać», — raspaviadaje minčuk.
Siarhiej kaža, što ŭ balnicy pra toje, što zdaryłasia, paviedamili ŭ sanepidemstancyju Partyzanskaha rajona i miascovuju administracyju.
«Spadziajusia, paśla hetaha situacyja źmienicca nie tolki ŭ našym padjeździe, ale i va ŭsim domie», — kaža baćka paciarpiełaj dziaŭčynki.