Trendy źmianiajucca. Google adsačyŭ, jak pracoŭnyja mihranty ź Biełarusi pieraklučylisia z Rasii na Polšču
30.10.2018 / 18:42
Biełaruskaje kiraŭnictva zapeŭnivaje Rasiju, što Biełaruś zusim nie razvaročvajecca na Zachad. Adnak sami biełarusy ŭžo daŭno raźviarnulisia ŭ zachodnim kirunku. Prynamsi, u pytańniach pracaŭładkavańnia i mihracyi. Servis Google Trends pakazvaje, kali adbyŭsia pierałom i jaki rehijon krainy ciapier mienš za ŭsio cikavicca pracaj u Rasii, piša Hrodna.life.
Jeździć na zarobki ŭ inšyja krainy dla biełarusaŭ — zvyčajnaja sprava. Ale apošnim časam kolkaść mihrantaŭ chutka pavialičvajecca i heta pryznaje navat aficyjnaja statystyka.
Samym papularnym nakirunkam dla vyjezdu na zarobki raniej była Rasija. Padziei va Ukrainie ŭ 2014 hodzie, aneksija Krymu i dalejšyja sankcyi abrynuli kurs rasijskaha rubla. Heta padšturchnuła biełarusaŭ da pošuku inšaj krainy dla pracy.
Padzieńnie kursa — padzieńnie popytu
Pracu aktyŭna šukajuć z dapamohaj internetu. Zhodna z dadzienymi Google Trends rost kolkaści zapytaŭ «rabota v Polšie» ź Biełarusi ŭ pašukaviku pryjšoŭsia na pačatak 2015 hoda. Heta akurat toj čas, kali kurs rasijskaha rubla vahaŭsia ŭ miežach 65 za dołar.
Abjava na terytoryi Polščy, nadaloka ad miažy ź Biełarussiu.
Hety trend zachavaŭsia i ŭžo praz hod, u pačatku 2016, zapyt «Rabota v Rossii» sastupiŭ pa papularnaści zapytu «rabota v Polšie». Z taho času kolkaść zapytaŭ «Rabota v Polšie» raście, a kolkaść zapytaŭ «rabota v Rossii» praciahvaje padać.
Raskład pa rehijonach
Praca ŭ Rasii bolš za ŭsio cikavić žycharoŭ uschodnich rehijonaŭ Biełarusi. Ale ŭ 2018 hodzie ŭžo nidzie ŭ krainie zapyt «Rabota v Rossii» nie pieravyšaje pa papularnaści «Rabota v Polšie».
Za hod tolki ŭ Polšču źjazdžaje ceły horad
Toje, što ŭsio bolš biełarusaŭ vybirajuć dla pracy i mihracyi krainy ES pacviardžajuć ličby Jeŭrastatu.
U 2017 hodzie 51 841 hramadzianin Biełarusi atrymaŭ vid na žycharstva ŭ krainach Jeŭrapiejskaha sajuza. Ź ich 42 756 atrymali vid na žycharstva ŭ Polščy. Aproč hetaha ŭ 2017 hodzie 35 000 biełarusaŭ atrymali polskija pracoŭnyja vizy.
Kali skłaści hetyja ličby, to atrymajecca, što letaś tolki ŭ Polšču źjechaŭ ceły Žłobin (76 tysiač) abo dźvie Smarhoni.