Vice-prezident Jeŭrakamisii: Hałoŭnaja prablema ES — krainy z «rasijskim typam demakratyi»
Niekatoryja jeŭrapiejskija krainy vybirajuć «rasijski typ demakratyi», i heta samy vialiki vyklik dla Jeŭrapiejskaha Sajuza na dadzieny momant.
22.01.2019 / 19:55
Pra heta ŭ intervju CNBC zajaviŭ vice-prezident Jeŭrakamisii pa pytańniach pracoŭnych miescaŭ, rostu inviestycyj i kankurentazdolnaści Jurki Katajnien.
Pavodle jaho słoŭ, ES kirujecca libieralnaha typu demakratyi, dzie viaršenstva prava źjaŭlajecca adnoj z hałoŭnych kaštoŭnaściaŭ.
«Isnujuć novyja vykliki z boku niekatorych našych krain-siabraŭ, dzie niekatoryja palityčnyja lidary nie pavažajuć libieralnuju demakratyju tak, jak raniej», — skazaŭ jon.
«Takim čynam, usia jeŭrapiejskaja intehracyja i Jeŭrapiejski Sajuz hruntujucca na libieralna-demakratyčnych kaštoŭnaściach, u pryvatnaści viaršenstvie prava, i ciapier raptam źjaŭlajucca palityčnyja lidary, jakija ličać, što rasijski typ demakratyi značna lepšy, čym libieralnaja demakratyja, i heta prynosić zusim novy šerah vyklikaŭ», — skazaŭ Katajnien na Suśvietnym ekanamičnym forumie ŭ Davosie, Šviejcaryja.
Jeŭrapiejskaja Kamisija letaś inicyjavała sankcyjnuju praceduru suprać Polščy za realizacyju mier, jakija, u pryvatnaści, paŭpłyvali na pryznačeńnie sudździaŭ u vyšejšyja sudy krainy.
«Krainy, takija jak Polšča, Vienhryja i Rumynija, jany adchilajucca ad ustojlivaha libieralna-demakratyčnaha šlachu — heta, na maju dumku, samy vialiki vyklik, ź jakim ciapier sutykajecca ES», — skazaŭ Katajnien.