Łukašenku pradstavili Kancepcyju infarmacyjnaj biaśpieki Biełarusi

12.03.2019 / 12:05

Prajekt Kancepcyi infarmacyjnaj biaśpieki Biełarusi — heta vyklučna biełaruski nacyjanalny pradukt, raźličany na šyrokaje ŭnutranaje i źniešniaje spažyvańnie. Pra heta dziaržsakratar Rady biaśpieki Stanisłaŭ Zaś zajaviŭ siońnia na pasiadžeńni Rady biaśpieki z udziełam Łukašenki, piša BiełTA.

«Heta vyklučna naš ułasny, nidzie nie zapazyčany nacyjanalny pradukt, raźličany na šyrokaje ŭnutranaje i źniešniaje spažyvańnie, jaki raźvivaje Kancepcyju nacyjanalnaj biaśpieki. Jaho asnoŭnaje pryznačeńnie — nadać dziejnaści pa harantavańni biaśpieki ŭ infarmacyjnaj śfiery ŭparadkavanaść, kankretnaść i nacelenaść na vynik, a taksama zabiaśpiečyć umovy dla dalejšaha prasoŭvańnia napierad u hetym pytańni», — raspavioŭ Stanisłaŭ Zaś.

Jon nahadaŭ, što prajekt Kancepcyi infarmacyjnaj biaśpieki Biełarusi raspracoŭvaŭsia pa daručeńni prezidenta. Pavodle słoŭ dziaržsakratara, da hetaj pracy pryciahnuli ŭsie zacikaŭlenyja viedamstvy i samych kampietentnych śpiecyjalistaŭ krainy. U padrychtoŭcy prajekta ŭdzielničali śpiecyjalisty z amal 20 dziaržaŭnych orhanaŭ i arhanizacyj, pradstaŭniki viadučych srodkaŭ masavaj infarmacyi, deputaty, navukoŭcy i ekśpierty.

U dakumiencie adlustravany sučasnyja vykliki i pahrozy, jakija farmujucca ŭ infarmacyjnaj śfiery i pradstaŭlajuć niebiaśpieku dla kanstytucyjnych asnoŭ i žyćciadziejnaści dziaržaŭ: manipulavańnie masavaj śviadomaściu, dyskredytacyja ideałaŭ i kaštoŭnaściaŭ, razmyvańnie nacyjanalnaha suvierenitetu, niaŭstojlivaść infarmacyjnaj infrastruktury i inšyja.

Z ulikam hetaha ŭ prajekcie kancepcyi ŭpieršyniu zamacavana paniaćcie infarmacyjnaha suvierenitetu jak nieadjemnaje i vyklučnaje viaršenstva prava dziaržavy samastojna vyznačać praviły vałodańnia, karystańnia i rasparadžeńnia nacyjanalnymi infarmacyjnymi resursami, ažyćciaŭlać niezaležnuju źniešniuju i ŭnutranuju dziaržaŭnuju infarmacyjnuju palityku, farmavać nacyjanalnuju infarmacyjnuju infrastrukturu, harantavać infarmacyjnuju biaśpieku.

Miarkujecca, što heta budzie dasiahnuta ŭ tym liku za košt praviadzieńnia palityki infarmacyjnaha niejtralitetu, jakaja praduhledžvaje pavahu ahulnapryznanych i ahulnapryniatych pravoŭ luboj dziaržavy ŭ hetaj śfiery, vyklučeńnie ŭmiašańnia ŭ infarmacyjnuju śfieru inšych krain.

Upieršyniu ŭ publičnym dakumiencie taksama pakazvajecca hatoŭnaść dziaržavy bieśpierapynna vyjaŭlać ryzyki, vykliki i pahrozy ŭ infarmacyjnaj śfiery i reahavać na ich. Uvodzicca ŭ aficyjny abarot termin «kibierbiaśpieka», i heta, na dumku raspracoŭščykaŭ, vyznačaje jasnaje aryjentavańnie dziaržavy na pryniatyja i ŭžo dosyć pastannyja ŭ śviecie asnoŭnyja padychody da procidziejańnia kampjutarnym incydentam i złačynstvam.

Akramia efiektyŭnaj pracy ŚMI, u prajekcie kancepcyi padkreślivajecca važnaść aktyŭnaj prysutnaści dziaržavy ŭ internecie: razmova idzie nie tolki pra aficyjnyja sajty dziaržaŭnych orhanaŭ, ale i pra błohaśfieru, miesiendžary i sacyjalnyja sietki.