Prychilnik Pucina, siabra ekzatyčnaj partyi, laśnik: piać faktaŭ ab piaci čynoŭnikach, jakich siońnia pryznačyŭ Łukašenka
28.03.2019 / 19:54
Alaksandr Łukašenka zładziŭ 28 sakavika kadravy dzień. Pra niekatorych z pryznačencaŭ u artykule «Našaj Nivy».
Pazityŭny pasoł u AAE
Andrej Łučanok u niderłandskich ciulpanach. Fota z ok.ru.
Ad leta ŭ Biełarusi nie było svajho pasła ŭ Abjadnanych Arabskich Emiratach. Sprava ŭ tym, što minuły dypłamat Raman Hałoŭčanka pajšoŭ na pavyšeńnie i ŭznačaliŭ Vajskova-pramysłovy kamitet. AAE — heta klučavaja dla Biełarusi kraina ŭ arabskim śviecie. Tudy na adpačynak nie raz jeździŭ Alaksandr Łukašenka, niaredka z pryvatnymi i dziaržaŭnymi vizitami ŭ Abu-Dabi naviedvajecca i starejšy syn kiraŭnika Biełarusi Viktar.
Novamu pasłu Andreju Łučanku 46 hadoŭ. Jon minčuk, chadziŭ u škołu №127 na vulicy Bieruta. Paśla hetaha vučyŭsia ŭ Linhvistyčnym univiersitecie na fakultecie francuzskaj movy, jaki skončyŭ u 1994 hodzie. Paśla hetaha trapiŭ na słužbu ŭ MZS.
Praca ŭ AAE budzie pieršaj samastojna ŭ karjery Łučanka. Naprykancy 1990-ch jon źjaŭlaŭsia supracoŭnikam pasolstva našaj krainy ŭ Siryi. U sacyjalnych sietkach jon zhadvaŭ, što sumuje ŭ Biełarusi pa ŭschodniaj kuchni, a voś palityčnuju kuchniu hetaj krainy nazyvaje «presnaj».
Paśla spadar Łučanok źjaŭlaŭsia daradcam pasła našaj krainy ŭ Niderłandach. Vidavočna, što žyćciom u hetaj krainie jon praniknuŭsia. Šmat vykładaŭ zdymkach i ź ciulpanami, i z syrami. Łučanok zaŭziaty padarožnik, u jaho jość fotki jak z Kitaja, hetak i z Manbłana.
Apošnim časam dypłamat pracavaŭ u Minsku, dzie byŭ načalnikam upraŭleńnia Afryki i Blizkaha Uschodu. Pa hetaj linii niaredka sustrakaŭsia z pasłom AAE ŭ Biełarusi.
Spadar Łučanok — futbolny amatar, zaŭzieje za marselski «Alimpik». Siarod upadabanych im staronak u fejsbuku — «Lavon Volski», «Mova na kožny dzień», «Uładzimir Karatkievič», «Padarožžy dyletanta».
Prychilnik Pucina ŭznačaliŭ Frunzienski rajon
Siarhiej Škrudnieŭ. Fota z ok.ru.
Samy šmatliki rajon Minska i ŭsioj Biełarusi — Frunzienski — uznačaliŭ 43-hadovy Siarhiej Škrudnieŭ. Da apošniaha času jon byŭ načalnikam upraŭleńnia rehijanalnaha raźvićcia Aparata Savieta ministraŭ.
Škrudnieŭ naradziŭsia ŭ siale Ivanaŭka Amurskaj vobłaści Rasii. Praŭda, hadavaŭsia jon u vioscy Kuźmičy Lubanskaha rajona. Tam ža skončyŭ škołu. Paśla pastupiŭ na fakultet miechanizacyi BDATU. Paśla vučoby adsłužyŭ u čyhunačnych vojskach u Žodzinie.
Pracavaŭ u Minskim abłspažyŭsajuzie, u Departamiencie dziaržaŭnaj inśpiekcyi pracy Ministerstva pracy, u administracyi Kastryčnickaha rajona Minska.
Škrudnieŭ maje dvuch synoŭ. Adzin ź ich, prynamsi, byŭ navučencam Minskaha suvoraŭskaha vučylišča.
Admietna, na jakija supołki Siarhiej Škrudnieŭ padpisany ŭ sacyjalnych sietkach: «Kłub siabroŭ U.U. Pucina», «Nastalhija pa SSSR», «Uładzimir Uładzimiravič Pucin». Šmat čynoŭnik i łajkaje vyjavaŭ z Pucinym. Kali pahladzieć jaho staronku, to tam i vinšavańnie Łaŭrova z dniom naradžeńnia, i reakcyja na zabaronu rasijskim lohkaatletam brać udzieł u Alimpijadzie, i pra rasijskuju «piatuju kałonu», i pra toje, što ZŠA adciapali ŭ Mieksiki Techas. Składvajecca ŭražańnie, što Škrudnieŭ žyvie zusim nie ŭ Biełarusi, a ŭ susiedniaj dziaržavie.
Siabra ekzatyčnaj partyi
Fota z ctv.by.
37-hadovy Hienadź Lubatynski staŭ kiraŭnikom Kastryčnickaha rajona Minska. Jon rodam z Vaŭkavyska, chadziŭ tam u 6-ju škołu.
Vučyŭsia ŭ narhasie, jaki skončyŭ u 2004 hodzie. Admietna, što pracoŭnuju karjeru pačaŭ u BRSM. Ad 2004 da 2007 byŭ sakratarom piarvički BRSM u rodnym univiersitecie. Paśla hetaha źviazaŭ los z Zavodskim rajonam Minska, dzie pačynaŭ načalnikam upraŭleńnia pa spravach moładzi, a apošniaj jahonaj pasadaj było — načalnik upraŭleńnia kapitalnaha budaŭnictva Zavadskoha rajona.
Zaznačym, što Lubatynski źjaŭlajecca siabram takoj redkaj partyi, jak Sacyjalna-spartyŭnaja. Letaś jon vyłučaŭsia ŭ jakaści kandydata ad partyi na miascovyja vybary pa Aŭtazavodskaj vybarčaj akruzie. Deputatam, praŭda, staŭ nie jon, a namieśnik dyrektara MAZa Andrej Zaŭharodni. Byŭ delehatam Usiebiełaruskaha schodu.
Spadar Lubatynski žanaty ź jašče adnoj vypusknicaj narhasa Śviatłanaj Zacharanka (ciapier Lubatynskaja), jana rodam sa Śvietłahorska. U pary jość dzieci: dva syny i małodšaja dačka.
Laśnik u Zavodskim rajonie
Siarhiej Maślak ź siamjoj. Fota z vk.com.
Siarhiej Maślak taksama z maładoha pakaleńnia mieniedžaraŭ. Jamu 38 hadoŭ. Rodam jon ź Minska, z Čyžoŭki. Mama čynoŭnika rodam z Babrujskaha rajona.
Vučycca Siarhiej Maślak pajšoŭ u Technałahičny ŭniviersitet na śpiecyjalnaść «inžynier lasnoj haspadarki», jaki skončyŭ ŭ 2004 hodzie. Pa raźmierkavańni byŭ adpraŭleny ŭ Vałmianskaje laśnictva Minskaha rajona, dzie pracavaŭ pamočnikam laśničaha, adtul syšoŭ inžynieram u «Biełhiprales». Uznačalvaŭ «Zialonhas» Zavodskaha i Pieršamajskaha rajonaŭ Minska.
Apošnija čatyry hady byŭ staršynioj Minskaha haradskoha kamiteta pryrodnych resursaŭ i achovy navakolnaha asiarodździa.
Maślak žanaty, maje dvaich dziaciej. Na jahonaj staroncy Ukantakcie źmieščanaje pryhožaje siamiejnaje fota z adpačynku na Kipry.
Kiraŭnik Partyzanskaha rajona budavaŭ masty
Valeryj Varanicki. Fota «Minsk-Naviny».
Partyzanski rajon Minska addali 40-hadovamu Valeryju Varanickamu. Vydańnie «Minsk-Naviny» piša, što Varanicki rodam z Zelvy, a sam skončyŭ BNTU. Pačynaŭ svaju pracoŭnuju karjeru ŭ «Mostbudzie» ŭ jakaści staršaha majstra. Byŭ hałoŭnym inžynieram u «Haraŭtamost».
Ad 2012 hoda pracuje ŭ administracyi Leninskaha rajona Minska. Ad 2015 hoda byŭ pieršym namieśnikam kiraŭnika rajona. Adznačym, što čynoŭnik braŭ udzieł u roznych śviatkavańniach, jakija prachodzili na chipstarskaj Kastryčnickaj vulicy ŭ Minsku.