У Магілёўскім раёне службовы сабака па мянушцы Багіра знайшоў жанчыну, якая знікла
15.05.2019 / 21:07
Паведамленне аб тым, што ў вёсцы Лежнеўка пенсіянерка выйшла з дому і прапала, паступіла ў міліцыю на майскіх выходных. Кіналагічны нарад групы затрымання са службовым сабакам па мянушцы Багіра выехаў на месца здарэння.
Як высветлілася, жанчына прыехала пагасціць да роднага брата. Прыкладна а восьмай гадзіне вечара яна выйшла з дому і сышла ў невядомым кірунку. Як толькі мужчына зразумеў, што сястра знікла, адразу ж звярнуўся па дапамогу ў міліцыю.
Праваахоўнікі ўдакладнілі прыметы жанчыны. Кінолаг папрасіў яе асабістыя рэчы і паставіў на след Багіру. Сабака павёў міліцыянераў у бок суседняй вёскі. Праз чатыры з паловай кіламетры ў пачатку другой гадзіны ночы сабака знайшоў жанчыну. На службовым аўтамабілі яе даставілі дадому да брата.