Čamu my łysiejem i što z hetym rabić — tłumačyć dermatołah
«Pakul nie stała modna być łysym i pakul nie źjavilisia vysokaefiektyŭnyja srodki pa baraćbie z ałapiecyjaj, abo abłysieńniem, emacyjnyja pieražyvańni mužčyn u suviazi z hetaj prablemaj byli paraŭnalnyja ź pieražyvańniami pry impatencyi. Niekatoryja abłysieńnia bajalisia navat bolš», — uvodzić u prablemu doktar-dermatołah, dacent kafiedry dziermatavienierałohii i kaśmietałohii BiełMAPA Natalla Papłaŭskaja.
28.05.2019 / 11:44
Fota Pixabay.
Prablema redkich vałasoŭ tak ci inakš zakranaje 65% nasielnictva Biełarusi va ŭzroście ad 25 da 55 hadoŭ. U hety ž čas da dermatołahaŭ z prablemaj vypadzieńnia vałasoŭ źviartajucca tolki 8% biełarusaŭ. Pryniata ličyć, što kali čałaviek łysieje, to vinavatyja hieny.
«Viadoma, hieny sapraŭdy ŭpłyvajuć na jakaść i kolkaść vałasoŭ. Andrahienietyčnaja ałapiecyja moža naziracca i ŭ zdarovych mužčyn z 17 hadoŭ, i navat u maładych žančyn da 30 hadoŭ, nie kažučy pra bolš starejšy ŭzrost», — adznačaje dermatołah.
U pracesie hetaha vidu abłysieńnia vałasy stanoviacca bolš tonkimi, karotkimi i mienš pihmientavanymi. U mužčyn i žančyn malunak abłysieńnia adroźnivajecca. Kali ŭ mužčyn źjaŭlajecca zaŭvažnaja łysina, to vałasy žančyny značna radziejuć uzdoŭž prabora.
«Ale nie tolki hieny vinavatyja ŭ abłysieńni, — praciahvaje Natalla Papłaŭskaja. — Časta jaho pravakujuć stres, infiekcyi i zachvorvańni endakrynnaj sistemy, chvaroby stravavalnaj sistemy, u vyniku jakich parušajecca praces usmoktvańnia i zasvajeńnia vitaminaŭ i mikraelemientaŭ, roznyja dyjety, rody i karmleńnie hrudźmi, zachvorvańni sasudaŭ, dysbałans viehietatyŭnaj niervovaj sistemy. Pryčym abłysieńnie moža raźvicca praz 3—4 miesiacy paśla ŭździejańnia pryčynnaha faktaru. Byvaje, čałaviek pieranios chvarobu try miesiacy tamu, a vałasy pačali vypadać tolki ciapier. Tamu, kali ŭ vas źjavilisia prablemy z vałasami, varta abaviazkova pakazacca dermatołahu albo kaśmietołahu, jaki pryznačyć nieabchodnyja analizy».
Prablema abłysieńnia adnolkava turbuje jak žančyn, tak i mužčyn. I jašče pytańnie, kaho bolš.
«Mužčyny vielmi baluča ŭsprymajuć toje, što pačynajuć łysieć. Časam padčas lačeńnia ad abłysieńnia pacyjentu patrabujecca spadarožnaja dapamoha psichaterapieŭta. Praces lačeńnia zajmaje praciahły pieryjad. Zdarajecca, kali čałaviek nie bačyć chutkaha vyniku, pačynaje pieražyvać, što jamu ŭžo ničoha nie dapamoža», — tłumačyć dermatołah.
Ci jość sens zmahacca z abłysieńniem? Natalla Papłaŭskaja pierakananaja, što jość. Siońniašnija viedy, sučasnyja mietady dyjahnostyki i lačeńnia abłysieńnia vyrašajuć hetuju prablemu. Samaje važnaje — vyznačyć sapraŭdnuju pryčynu chvaroby i vypracavać adpaviednuju taktyku, jak ź joj zmahacca. Čym raniej budzie pačataje lačeńnie, tym vyšej jaho efiektyŭnaść.
Siońnia daktary-dermatołahi majuć u svaim arsienale efiektyŭnyja srodki vonkavaha prymianieńnia, rekamiendavanyja dla lačeńnia andrahienietyčnaj ałapiecyi ŭ žančyn i mužčyn. Jak praviła, ich nanosiać z dazatara-raspylalnika 1—2 razy na praciahu dnia na ŭčastki vypadzieńnia vałasoŭ. Efiekt ad lačeńnia stanovicca zaŭvažnym praz 3—4 miesiacy paśla jaho pačatku. Ale pakolki pieršasnyja vyniki treba padtrymać, poŭny kurs doŭžycca ad 6 da 12 miesiacaŭ. Pryznačyć lačeńnie kankretnym preparatam pavinien doktar, z ulikam indyvidualnych asablivaściaŭ pacyjenta.
Časam možna puskać u chod i chatnija srodki.
«Narodnyja srodki, da jakich adnosim, naprykład, dziadoŭnik, mohuć być dobrym dadatkam da sučasnych mietadaŭ lačeńnia. Jość cełaja sieryja šampuniaŭ i srodkaŭ dla dohladu za vałasami na asnovie aleju z łopuchu, jakija pradajucca ŭ aptekach i dobra siabie zarekamiendavali. Čamu nie? — rytaryčna pytajecca Natalla Papłaŭskaja. — Da narodnych mietadaŭ možna adnieści terapiju lubymi preparatami raślinnaha pachodžańnia, jakija ŭ tym liku akazvajuć razdražnialnaje ŭździejańnie. Fitapreparaty paraŭnalna biasškodnyja i dastupnyja. Časta ŭžyvajuć, naprykład, liście krapivy, korań łopuchu, kvietki kalenduły, travu śviatajańnika, maciarduški, šyški chmielu. Adnak pry ŭsioj vonkavaj biaśpiecy fitapreparaty mohuć vyklikać alerhičnyja reakcyi».
Kali havorka idzie pra abłysieńnie, nielha zabyvać, što na jakaść i kolkaść vałasoŭ mohuć upłyvać chvaroby skury hałavy, jakich davoli šmat. Lubyja źmieny — łuščeńnie, vysypańnie, śvierb, stančeńnie vałasoŭ, łomkaść — pavinny vieści na pryjom da doktara-dermatołaha.
Treba taksama ŭličvać, što bieśpierapynna idzie naturalnaje abnaŭleńnie vałasoŭ. U sutki niezaŭvažna dla nas samich vypadaje kala 100-150 vałasoŭ, jakija zastajucca na rasčoscy ci ŭ rakavinie vanny. Heta nie pavinna vyklikać paniku, ale, kab supakoić siabie, asabliva kali ŭ siamji byli tyja, chto rana pasivieli ci abłysieli, źviarniciesia da śpiecyjalista. Jon paraić, jak pravilna dahladać za vałasami, ad jakich praduktaŭ treba admovicca, a jakija, naadvarot, varta ŭklučyć u svoj racyjon, prakansultuje pa pryjomie vitaminaŭ i mikraelemientaŭ ci pryznačyć dadatkovaje abśledavańnie.
Fota Pixel-Shot / Shutterstock.
«Vałasy adyhryvajuć važnuju rolu ŭ našym žyćci, jany zdaŭna ličacca adnym z atrybutaŭ vonkavaj pryvabnaści. Što datyčycca dohladu za imi, to nie varta hrebavać sučasnymi prafiesijnymi mietadami palapšeńnia jakaści vałasoŭ: aparatnymi i injekcyjnymi mietodykami, miezaterapijaj. A što adnosna štodzionnaha dohladu, to raju vykarystoŭvać srodki dla abarony ad ultrafijaletu, termalnuju vadu, uvilhatnialnyja sprei. Kali jość nieabchodnaść u častym myćci vałasoŭ, to lepš rabić heta ŭ ranišnija hadziny, vada nie pavinna być haračaj», — nahadvaje Natalla Papłaŭskaja.
Jość adna pamyłka, jakuju dapuskajuć amal usie: pry vybary šampuniu treba brać nie toj, što padychodzić pad peŭny typ vałasoŭ, a toj, što prydatny dla skury hałavy.
«Kali budzie zdarovaja skura, vy ŭbačycie, jakimi pasłuchmianymi i pryhožymi stanuć i vašy vałasy», — padsumoŭvaje dermatołah Natalla Papłaŭskaja.