«Paśla hetych preparataŭ nielha ciažaryć try hady». Dermatołahi — pra toje, jak pravilna zmahacca z akne
Akne — heta nie tolki prablema padletkaŭ. Nie zaŭsiody sa skančeńniem pierachodnoha ŭzrostu skura viartajecca ŭ narmalny stan. Jakija pamyłki robiać dziaŭčaty ŭ baraćbie z pryščami, jak pravilna lačyć vuhravuju chvarobu, čamu asobnym pacyjentkam zabaraniajuć ciažaryć na niekalki hadoŭ i ci praŭda, što lepš nanosić makijaž palcami, a nie sponžykam? Raźbirajemsia z daktarami.
28.06.2019 / 11:45
Z-za čaho ŭźnikaje akne?
Pryčyn moža być niekalki. Asnoŭnaja — upłyŭ pałavych harmonaŭ. Čaściej za ŭsio sprava ŭ lišku testasteronu, jaki moža vyklikać hipierpradukcyju skuranoha sała.
Časam rolu hraje hienietyčnaja schilnaść.
— Kali parušany miechanizm arahavieńnia vonkavaha słoju epidermisu, skura nie adšałušvajecca i nie abnaŭlajecca jak śled. Zakuporvajucca vuści vyvadnych pratokaŭ salnych załoz. U vyniku załoza razryvajecca, i ŭmoŭna chvarobatvornaja mikrafłora, jakaja jość na skury ŭ kožnaha, vyklikaje zapalenčuju reakcyju, — kaža doktar-dermatavienierołah centra «Skinluks» Taćciana Nohcieva.
Doktar-dermatavienierołah Taćciana Nohcieva.
Vuhry mohuć spravakavać lekavyja preparaty z bromam — ich vypisvajuć, kali jość prablemy sa stanam niervovaj sistemy.
Siarod pryčyn, źviazanych z vysypańniami, — taksama rehulacyja sasudzistaha tonusu, stan ślizistaj straŭnika i ekałohija. Aciahčalnymi faktarami mohuć być niapravilny dohlad skury, lišak stresu, nieracyjanalnaje charčavańnie.
Top-4 pamyłak u baraćbie z pryščami
Zastacca adzin na adzin sa svajoj prablemaj. «Nichto nie sprabuje samastojna pastryhčysia ci vydalić apiendycyt. Treba zrazumieć, što akne — heta zachvorvańnie i źviarnucca da śpiecyjalista», — adznačaje doktar-kaśmietołah, dermatołah centra Žanna Kudzina.
Kaśmietołah Žanna Kudzina.
Vyciskać ci časać pryščy. Lepš naohuł jak maha mienš macać tvar. Pamyłkaj budzie i skuplać usie srodki ŭ aptecy, jakija abiacajuć pazbavić ad vysypańniaŭ, pierabolšvać z kaśmietykaj z ahresiŭnymi padsušvajučymi kampanientami.
Ekśpierymientavać ź ježaj. Charčavańnie musić być zbałansavanym, bahatym na vitaminy, białok i minierały. «Chutkija» vuhlavody, haziroŭki, vostraje, sałodkaje — ad hetaha lepš ustrymacca. Kandytarskija vyraby pavyšajuć uzrovień cukru ŭ kryvi i, adpaviedna, u skury. A heta pažyŭnoje asiaroddzie dla mikraarhanizmaŭ, jakija vyklikajuć zapaleńnie.
Ad viehietaryjancaŭ časam možna pačuć, što admova ad miasa pazbaviła ich ad vysypańniaŭ. U hetym moža być dola praŭdy: miasa ciažka pieratraŭlajecca i ŭskładniaje pracu straŭnika (a jaho stan, nahadajem, źviazany sa stanam skury). Ale miedyki nie zaklikajuć da viehietaryjanstva.
— Heta nie zusim racyjanalna — asabliva dla padletkaŭ, jakija čaściej za ŭsio sutykajucca z prablemaj akne. Na 100% žyviolny białok zamianić niemahčyma, a jon važny dla arhanizma, jaki farmirujecca. U hetym uzroście moładź i tak adčuvaje vialikija stresavyja nahruzki z-za harmanalnaha statusa, a taksama ŭvachodu ŭ darosłaje žyćcio — ekzamienaŭ, pieršaha kachańnia. Kali ŭ hety momant zabrać u arhanizma «budaŭničy materyjał», heta moža vylicca ŭ roznyja zachvorvańni, — papiaredžvaje Žanna Kudzina.
Šmat zaharać. Tak, sonca i salaryj palapšajuć stan skury — ale heta karotkaterminovy efiekt.
— Doŭhaje znachodžańnie pad ultrafijaletavymi pramianiami abvastraje situacyju, i praź miesiac-dva zachvorvańnie praciakaje ciažej, — zaŭvažaje Taćciana Nohcieva.
Jakija abśledavańni treba prajści?
Najpierš — zdać ahulnyja analizy kryvi i mačy, bijachimičny analiz kryvi. Pry ciažkaj stadyi akne skuru praviarajuć na mikrafłoru i adčuvalnaść da antybijotykaŭ.
Vysypańni mohuć być źviazanyja z parušeńniem dziejnaści jaječnikaŭ, nadnyračnikaŭ, ščytapadobnaj załozy. Tamu doktar raspytvaje pra stan orhanaŭ, skarhi pacyjentki i pryznačaje skryninh peŭnych harmonaŭ. Kali ŭzrovień harmonaŭ narmalny, pravodziać dadatkovaje abśledavańnie na seks-źviazany hłabulin, kab razabracca ŭ situacyi.
Što dapamoža vylečyć prablemnuju skuru?
— Na pieršaj stadyi stadyi zachvorvańnia čaściej prymianiajuć miascovyja vonkavyja srodki, kab źniać abvastreńnie. Naprykład, uzboŭtanyja sumieści z antybijotykami ci inšymi dezynfiektantami, takimi jak siera, — apisvaje lačeńnie Taćciana Nohcieva. — Kali praces bolš hłyboki, tady pryznačajem antybijotyki ŭnutr. Tabletki pjuć kursami da troch miesiacaŭ.
Pry kistoznych vuhrach (tych, paśla jakich zastajucca rubcy) padklučajuć «ciažkuju artyleryju» — recinoidy. Heta preparaty ź vialikaj daziroŭkaj vitamina A. Jak praviła, jany dajuć dobry vynik. Ale majuć surjozny pabočny efiekt.
— Kali žančyna ŭžyvaje recinoidy, jana daje padpisku, što na praciahu troch hadoŭ paśla lačeńnia nie budzie ciažaryć. Bo hetyja preparaty vałodajuć teratahiennymi ŭłaścivaściami i vyklikajuć vyrodlivaść płoda, — źviartaje ŭvahu dermatołah.
Vielmi važny štodzionny chatni dohlad. Jon pavinien składacca z troch etapaŭ: ačyščeńnie, tanizavańnie i, niahledziačy na toje što skura tłustaja, uvilhatnieńnie.
Fota medaboutme.ru.
— Srodki mohuć utrymlivać kisłoty (u pieršuju čarhu hlikolevuju ci azałainavuju), vonkavyja recinoidy (vytvornyja vitaminu A, ale ź minimalnym pabočnym efiektam). Abaviazkova musiać być SPF-filtry, bo pad uździejańniem preparataŭ źmianiajecca adkaz skury ŭltrafijaletavym pramianiam, a jaje važna abaraniać u hety pieryjad, inakš moža raźvicca pihmientacyja. Taksama ŭ skład uvachodziać padsušvajučyja kampanienty: cynk, salicyłavaja kisłata, sarbienty (vuhal, hlina), — pieraličvaje Žanna Kudzina.
Dadatkova možna padklučyć roznyja pracedury. Naprykład, pilinhi (ciapier jość takija, jakija možna rabić i ŭletku), fota- i łaziernaje lačeńnie (skura apracoŭvajecca śvietłavymi chvalami peŭnaj dyŭžyni — heta narmalizuje krovazvarot, źmianšaje vydzialeńnie skuranoha sała i zdymaje zapaleńnie).
Jość injekcyjnyja mietodyki: miezaterapija, injekcyi płazmy, uzbahačanaj trambacytami. Apošniaje — davoli novy mietad u kaśmietałohii. U pacyjentki biaruć kroŭ, centryfuhujuć jaje i ŭvodziać pad skuru. Takija ŭkoły stymulujuć kletki da adnaŭleńnia i baraćby z akne.
A što nakont narodnych srodkaŭ? Maski z kiefiru, haspadarčaha myła…
— Heta ŭžo pazaŭčoraŭšni dzień, — uśmichajecca Taćciana Nohcieva. — Kaniečnie, u niečym sens jość, bo heta kisłotny i ščołačny pilinh. Ale navošta ryzykavać, kali jość kaśmietyka z patrebnym pracentam hetych ahresiŭnych srodkaŭ?
Jak pazbavicca ad rubcoŭ?
Dla hetaha jość łaziernyja mietodyki. Jany dapamahajuć vyraŭniać skuru, prybrać pierapady, zrabić mienš zaŭvažnymi pihmientnyja plamy. Palapšeńnie mahčyma ŭžo paśla pieršaj pracedury. Adno «ale»: kali skura zarubcavałasia, viarnuć joj pieršapatkovy vyhlad užo niemahčyma.
Fota izum.ua.
Tamu važna svoječasova źviarnucca da dermatołaha i nie kałupać pryščy samomu. Bo raźbiracca z rubcami — heta doraha, baluča i doŭha.
Ci možna nanosić makijaž?
Možna. Treba tolki ŭličvać svoj typ skury. A kremy nie pavinny ŭtrymlivać silikony, parabieny, minieralnaje masła i inšyja kampanienty, jakija abciažvajuć ci zabivajuć pory.
— Važna makijaž zmyvać. Pryjšli dadomu — źniali kaśmietyku. Ja ŭžo nie kažu pra toje, što nielha spać z makijažam — inakš lačy nie lačy — ničoha nie dapamoža, — kaža Žanna Kudzina.
Kremy pavinny być u tubach, a nie ŭ bankach, bo kožny raz, kali my załazim tudy palcam, zanosim svaje mikroby.
Jašče adzin vorah — pendźlik ci sponžyk. Paśla kožnaha makijažu jaho treba myć z myłam i sušyć, inakš tam razmnažajucca mikraarhanizmy. A lepš naohuł admovicca ad sponžykaŭ i nanosić kaśmietyku čystymi palcami.
Fota kosmetista.ru.
Pamiatajcie, što sami hnajnički ni ŭ jakim razie nielha zamazvać i zapudryvać — jość ryzyka traŭmavać ich i raźnieści chvarobatvornuju mikrafłoru na inšyja ŭčastki skury. Lepš prypiačycie ich baŭtuškami-łaśjonami.
Kolki času zojmie lačeńnie i kali skura ŭžo ačuniaje?
Kab atrymać praciahłuju remisiju, moža spatrebicca hod i bolš.
— Lačeńnie akne — heta davoli składany praces, jaki zaležyć nie tolki ad lekara i pracedur. Jon u bolšaj stupieni zaležyć ad samoj pacyjentki — jak jana budzie vykonvać rekamiendacyja pa dohladzie skury, dyjecie, pryjomie preparataŭ, — kažuć śpiecyjalisty.
I jašče. Skuraj treba zajmacca pastajanna. Zakiniecie — pryščy mohuć viarnucca.
Apošnim časam papularnaść nabiraje taki ruch, jak akne-pazityŭ. Dziaŭčaty z prablemnaj skuraj nie chavajuć jaje pad hustym słojem tanalnaha kremu i lubiać takoj, jakaja jana jość. Cikava, što da hetaha ž zaklikajuć i kaśmietołahi. Bo kali ty lubiš svaju skuru, to nie budzieš čapać jaje brudnymi rukami i nie zabudzieš zrabić masku.