Jak pravilna chadzić u jahady? Čytajcie i źbirajcie!
Parady ad hramadskaj arhanizacyi «Achovy ptušak Baćkaŭščyny» i laśničaha Kašara-Almanskaha laśnictva Stolinskaha lachasa Alaksandra Kołba, jaki pracuje na Almanskich bałotach.
29.07.2019 / 13:21
Fota Juli Daraškievič
Što nielha rabić u jahadach?
Palić vohniščy. Ahoń i pažar — samaja vialikaja niebiaśpieka dla lesu. Pa statystycy pik pažaraŭ prypadaje na pačatak vieraśnia. Čamu? Heta pieryjad samaj nizkaj vady ŭ lesie. I pačatak siezona zboru bruśnic i žuravin. «Parušeńnie praviłaŭ pažarnaj biaśpieki — samaje častaje parušeńnie ŭ našym laśnictvie», — kaža Alaksandr Kołb.
Kidać akurki i zapałki. Kali pališ — budź pilny. Tušy lubuju krynicu ahniu.
Karystacca pietardami i inšaj piratechnikaj.
Rabić samastojnyja šmatdzionnyja stajanki ŭ niedazvolenych miescach.
Pałochać ptušak i padychodzić blizka (bližej za 200 mietraŭ) da hniozdaŭ. Niekatoryja ptuški ŭžo nie viernucca ŭ hniazdo, kali čałaviek spałochaŭ jaje ci padyšoŭ blizka da hniazda. Ptušaniaty zastanucca adny i, chutčej za ŭsio, zahinuć. Zaŭvažyli hniazdo ŭ lesie? Nie padychodźcie da jaho i nie razmaŭlajcie hučna.
Pakidać, zakapvać ci palić śmiećcie.
Jakuju vadu pić u lesie?
Adkazvaje Maksim Niamčynaŭ, śpiecyjalist pa pryrodaachoŭnych pytańniach «Achovy ptušak Baćkaŭščyny»:
— Lepš za ŭsio pić vadu, uziatuju z saboj. Vadu taksama možna brać u studniach ci kałonkach na śpiecyjalna abstalavanych stajankach u lesie i na bałotach.
— Što rabić kali takoj vady niama, a stajanka ŭ lesie niekalki dzion?
— Daždžavaja vada ci vada ź vierchavoha bałota amal dyściliravanaja, biez solej. Takaja vada nie spatolvaje smahu. Pić jaje biessensoŭna, jana nie zatrymlivajecca ŭ arhaniźmie.
Vada ŭ lasnych rekach i krynicach moža być niebiaśpiečnaj z epidemijałahičnaha punktu pohladu. Jaje treba kipiacić, kab paźbiehnuć zaražeńnia, — heta dapamoža ad kišačnych infiekcyj. Jana moža być zabrudžanaja piestycydami i ŭhnajeńniami. A ad hetaha navat kipiačeńnie nie dapamoža.
Što možna i treba rabić u lesie?
Fota Andrusia Hajovaha
Źbirać jahady ŭ siezon. Naprykład, siezon zboru žuravin pačynajecca naprykancy žniŭnia — u pačatku vieraśnia. Infarmacyju pra pačatak siezona možna daviedacca ŭ miascovym laśnictvie, administracyi achoŭnaj terytoryi, na sajtach miascovych uładaŭ i ŭ rajonnaj presie.
Zabirać śmiećcie z saboj.
Karystacca śpiecyjalna abstalavanymi stajankami. Čamu? Heta biaśpiečna, tamu što tam možna chutka atrymać dapamohu, tudy prakładzienyja darohi, tam jość inšyja ludzi, jakija zmohuć dapamahčy. Śmiećcie vyvozić lashas, jość prybiralnia. Heta važna. Takija stajanki, jak praviła, abstalavanyja ŭ biaśpiečnych dla dzikaj pryrody miescach.
Karystacca dla zboru jahad dazvolenymi pryładami. Z 2019 hoda možna źbirać jahady hrabianiami — ale! — pamiž zubcami pavinna być nie mienš za 5 mm.
Paviedamić u pažarnyja słužby ci laśnictva, kali zaŭvažyli ahoń ci pažar. Telefon 101, 112.
Mieć z saboj mabilny telefon i navihatar z zapoŭnienaj batarejaj, kab być na suviazi i nie zabłukać.
Kolki čałaviek moža sabrać jahad za dzień? «Niekatoryja źbirajuć i pa 50—60 kh, niekatoryja pa 10 kh», — kaža Alaksandr Kołb.
Chočaš zrabić bolš? Stań zachavalnikam dzikaj pryrody! «Zachavalniki» — prahrama «Achovy ptušak Baćkaŭščyny» u jakoj udzielničaje kala 200 čałaviek pa ŭsioj krainie. Jany adsočvajuć žyćcio važnych dla rehijona vidaŭ ptušak i vyjaŭlajuć pahrozy, vykonvajuć rolu dahladčykaŭ važnych dla ŭsich nas terytoryj.
«Achova ptušak Baćkaŭščyny» — kłapocimsia pra ptušak i pra ciabie.