Kupałaŭski teatr abjaviŭ kastynh akcioraŭ — vy možacie atrymać rolu ŭ «Paŭlincy»
20.09.2019 / 11:42
Adzin z samych papularnych teatraŭ krainy doryć mahčymaść usim achvotnym pasprabavać siabie ŭ roli akciora. 21 vieraśnia ŭ miežach Teatralnaha piknika ŭ Alaksandraŭskim skviery projdzie kastynh. Kab paŭdzielničać, nie treba być prafiesijanałam: dastatkova nabracca śmiełaści i za chvilinu ździvić publiku svaim talentam. Pa vynikach kastynhu žury abiare dvuch pieramožcaŭ — u dziciačaj i darosłaj uzrostavych hrupach. Abranyja kankursanty vystupiać na scenie Kupałaŭskaha.
Badaj, samaja raspaŭsiudžanaja mara dziacinstva — być akcioram, vystupać na scenie, łavić apładysmienty publiki. U darosłych kłopatach mnohija zabyvajucca na svaje dziciačyja žadańni, ale Kupałaŭski teatr ich nahadaje. Ciaham pałutara hadzin — z 13:30 da 15:00 — 21 vieraśnia budzie prachodzić kastynh. Jaho pieramožca siarod darosłych syhraje ŭ śpiektakli «Paŭlinka», a pieramožca ŭ dziciačaj katehoryi atrymaje rolu ŭ pastanoŭcy «Šlachcic Zavalnia, abo Biełaruś u fantastyčnych apaviadańniach».
Kab paspaborničać za rolu ŭ hetych topavych pastanoŭkach, treba vyjści na scenu, ustalavanuju ŭ Alaksandraŭskim skviery, i… zrabić toje, što padabajecca. Možna tančyć, raskazvać vieršy, žartavać ci prosta charyzmatyčna maŭčać — farmatam arhanizatary nie abmiažoŭvajuć. Jość tolki časavaje abmiežavańnie: na ŭvieś vystup dajecca adna chvilina. Paśla žury abviaščaje pieramožcaŭ i źviazvajecca ź imi dla ŭdakładnieńnia detalaŭ.
Aceńvać kankursantaŭ buduć režysior i akcior Raman Padalaka, a taksama akciory Kupałaŭskaha teatra Dźmitryj Jesianievič i Michaił Zuj. Dla ŭdziełu nie treba rehistravacca: kankursanty iduć pa paradku žyvoj čarhi. Akramia kastynhu, teatralny piknik rychtuje šmat cikavostak na luby hust. Nižej možna aznajomicca z padrabiaznaj prahramaj.
Prahrama Teatralny piknika — śviata adkryćcia 100-ha siezona Nacyjanalnaha akademičnaha teatra imia Janki Kupały
12:00 — uračystaje adkryćcio śviata. Histaryčny fotazdymak trupy teatra na fonie fasada teatra.
12:00 — 23:00 — pracuje street-bufiet. Tam možna pačastavacca aŭtarskimi teatralnymi setami «Noč na Kalady», «Čornaja panna Niaśviža», «Ludzi na bałocie», «ČajKa» i inšymi stravami.
12:00 — 13:30 — śpiecyjalistka pa etykiecie Aksana Zareckaja raskazvaje i pakazvaje, jak pavodzić siabie ŭ teatry, jakoje padbirać adzieńnie dla pachodu na pastanoŭku, jak karystacca pryładami ŭ teatralnym bufiecie.
12:00 — 16:00 — prachodziać majstar-kłasy dla dziaciej i darosłych, pracujuć zabaŭlalnyja placoŭki i fotazony. Možna sfatahrafavacca z sapraŭdnymi teatralnymi dekaracyjami i rekvizitam.
12:00 — 16:00 — dziejničaje barbier-placoŭka «Vusy Kupały». Možna zrabić sabie vusy jak u maładoha Janki Kupały ci inšyja cikavyja vobrazy.
12:30 — 15:30 — prachodziać ekskursii pa teatralnym zakuliśsi. My praviadziom vas pa nadzvyčajnych i tajamničych miescach teatra, kudy nikoli nie zaziraje hladač: butaforski, rekvizitarski, hrymiorny i kaściumierny cechi, art-faje, partretnaja halereja i inš. Admysłovy ekskursavod — Andruś Horvat.
13:30 — 15:00 — prachodzić kastynh akcioraŭ. Paspaborničajcie za prava vystupić na scenie Kupałaŭskaha! Nie treba być prafiesijanałam: prosta vychodźcie na scenu i ciaham chviliny demanstrujcie svoj talent u volnym farmacie.
16:00 — 18:00 — kancert kupałaŭcaŭ. Artysty teatra vykonvajuć svaje najlepšyja pieśni sa śpiektaklaŭ «Paŭlinka», «Teatr Uršuli Radzivił», «Miestačkovaje kabare», «Vieltmajstar-akardeon», «Pinskaja šlachta».
16:00 — 18:00 — pracuje hrym-placoŭka «FejsAp». Možna amaładzicca abo sastarycca da niepaznavalnaści ciaham niekalkich chvilin.
19:00 — 21:00 — adbyvajecca anłajn-tranślacyja ŭ skviery śpiektakla «Radziva Prudok» pavodle knihi Andrusia Horvata. Tranślacyja pastanoŭki ažyćciaŭlajecca pry padtrymcy videaservisa VOKA.
21:00 — 23.00 — budziem tančyć! Śviatočny kancert z udziełam Jahora Zabiełava, Śviatłany Bień, hurtoŭ «Kasijapieja» i ili-ili.