Кіраўнік Слоніма хоча спагнаць са Святланы Калінкінай 50 тысяч рублёў за распаўсюд допіса Нехты
26.09.2019 / 17:12
Кіраўнік Слоніма Генадзь Хоміч вырашыў пакараць яшчэ і шэраг выданняў, якія распаўсюдзілі допіс блогера Сцяпана Пуцілы. Той напісаў у сваім тэлеграм-канале Нехта, што чыноўніка, а пасля і яго жонку злавілі п’янымі за стырном. Афіцыйна інфармацыя так і не пацвердзілася.
Хоміч вырашыў звярнуцца ў суд. Яго інтарэсы прадстаўляе адвакат Марыя Колесава-Гудзіліна.
Чытайце: Кіраўнік Слоніма падаў у суд на блогера Нехту — патрабуе 50 тысяч рублёў за паклёп
Генадзь Хоміч. Фота: grodnonews.by
Хоміч хоча пакараць блогера Пуцілу і выданні, якія перадрукавалі інфармацыю.
Па інфармацыі «Нашай Нівы», пазовы пададзеныя супраць «Беларускага партызана», парталаў 21.by і bobruisk.ru («Вячэрні Бабруйск»).
Адзначым, што адказнасць будзе несці фізічная ці юрыдычная асоба, на якую зарэгістраваны сайт. У выпадку з «Беларускім партызанам» — непасрэдна Святлана Калінкіна.
Хоміч хоча спагнаць з усіх па 50 тысяч беларускіх рублёў. Калі чыноўнік выйграе суд, то атрыманыя грошы абяцае перадаць Слонімскай бальніцы.
Галоўная рэдактарка «Беларускага партызана» Святлана Калінкіна паведаміла «Нашай Ніве», што пакуль абдумвае стратэгію далейшых дзеянняў:
«Так, Хоміч падаў у суд на нас. Адказаць канкрэтна, што будзем рабіць, пакуль не магу. Калі трэба, то пойдзем у суд».
Святлана Калінкіна