У Лондане заявілі, што Брытанія знаходзіцца ў стане вайны з-за кібератак з РФ і КНР
30.09.2019 / 07:54
Вялікабрытаніі даводзіцца ўвесь час знаходзіцца ў стане вайны з-за кібератак з тэрыторый Расіі і іншых дзяржаў. З такім сцвярджэннем, як паведаміла ў нядзелю газета Daily Telegraph, выступіў начальнік брытанскага Штаба абароны генерал Нікалас Картэр.
«Зменлівы характар баявых дзеянняў паказвае, што межы паміж станамі міру і вайны сціраюцца. <…> Усё з-за таго, што суперніцтва буйных дзяржаў і барацьба ідэй з недзяржаўнымі структурамі пагражаюць нам кожны дзень», - цытуе выданне заяву Картэра.
На думку генерала, асноўная пагроза ў цяперашні час звязана з інфармацыйнай прасторай і зыходзіць з тэрыторыі Расіі і Кітая.
Паводле інфармацыі Daily Telegraph, у сваім выступе Картэр паабяцаў, што Вялікабрытанія не пакіне дзеянні сваіх супернікаў без адказу.
Расія і Кітай неаднаразова адхілялі сцвярджэнні аб нібыта датычнасці да кібератак.