Rehistracyja kandydataŭ u deputaty pačynajecca ŭ Biełarusi
08.10.2019 / 07:28
Akruhovyja vybarčyja kamisii 8-17 kastryčnik praviaduć rehistracyju kandydataŭ u deputaty Pałaty pradstaŭnikoŭ Nacyjanalnaha schodu siomaha sklikańnia, paviedamlaje BiełTA.
Pieradvybarnaja ahitacyja na parłamienckich vybarach u Biełarusi startuje ŭ siaredzinie kastryčnika paśla rehistracyi kandydataŭ u deputaty. Na nastupny dzień paśla jaje zakančeńnia akruhovyja vybarkamy praviaduć pamiž kandydatami žarabjoŭku dla taho, kab vyznačyć datu i čas ich vystupu na dziaržaŭnych radyjo i TB.
Vystupy kandydataŭ u deputaty pa radyjo i telebačańni projduć z 21 kastryčnika pa 6 listapada pa pracoŭnych dniach. Radyjovystupy buduć z 7.00 da 8.00, televizijnyja (jany buduć supravadžacca subtytrami ci pierakładam na movu žestaŭ) — z 19.00 da 20.00. Efirny čas kandydataŭ, jakija buduć bałatavacca pa Minsku, vydzielać «Radyjo-Minsk», kanał «Biełaruś 3», pa Minskaj vobłaści — radyjostancyja «Minskaja chvala», STV. Tym, chto budzie vyłučacca pa inšych abłaściach, čas daduć adpaviednyja abłasnyja teleradyjokampanii.
Dla teledebataŭ efirny čas reziervujecca z raźliku nie bolš za piać chvilin adnamu kandydatu. Paradak arhanizacyi i praviadzieńnia debataŭ, daty ich praviadzieńnia i viadučaha vyznačajuć teleradyjokampanii.
Svaju pieradvybarčuju prahramu pretendenty na miescy ŭ parłamiencie majuć prava apublikavać albo ŭ adnoj z respublikanskich abo miascovych haziet. Tekst kandydaty pavinny pradstavić u ŚMI nie paźniej 27 kastryčnika.
Vybary ŭ Pałatu pradstaŭnikoŭ pryznačanyja na 17 listapada, u Saviet Respubliki — na 7 listapada.