У Беларусі прынялі рашэнне аб стварэнні новай IT-ВНУ
14.10.2019 / 13:38
IT-ВНУ маюць намер стварыць у Беларусі да новага навучальнага года. Пра гэта паведаміў сёння журналістам першы намеснік прэм'ер-міністра Аляксандр Турчын пасля нарады ў кіраўніка дзяржавы па асобных пытаннях развіцця краіны ў лічбавай сферы, перадае БЕЛТА.
Нарада стала працягам сустрэчы кіраўніка дзяржавы з прадстаўнікамі IT-сферы ў Парку высокіх тэхналогій, якая прайшла ў красавіку гэтага года. На ёй актыўна абмяркоўваліся пытанні адукацыі і падрыхтоўкі спецыялістаў для галіны. На нарадзе гэтая тэма, паводле слоў Аляксандра Турчына, атрымала лагічнае завяршэнне: кіраўнік дзяржавы падтрымаў прапанову аб стварэнні IT-ВНУ.
«Гэта прапанова не толькі IT-супольнасці, але і нашых вядучых ВНУ: БДУ і БДУІР. Думаю, што ў найбліжэйшы час мы ўнясём на разгляд кіраўніка дзяржавы адпаведны праект нарматыўнага прававога акта, які будзе рэгуляваць дзейнасць гэтай установы адукацыі», — расказаў першы віцэ -прэм'ер.