Biełaruś atrymaje 259 miljonaŭ jeŭra na ramont 12 mastoŭ i trasy M3
03.12.2019 / 11:47
Jeŭrapiejski bank rekanstrukcyi i raźvićcia (JEBRR) vydzialaje 259 młn jeŭra na rekanstrukcyju ŭ Biełarusi 12 mastoŭ i trasy M3. Adpaviednaje kredytnaje pahadnieńnie padpisana siońnia pa vynikach sustrečy premjer-ministra Biełarusi Siarhieja Rumasa ź pieršym vice-prezidentam JEBRR Jurhienam Ryhterynkam, piša BiełTA.
Jak rastłumačyŭ žurnalistam ministr transpartu i kamunikacyj Biełarusi Alaksiej Aŭramienka, pieršy kampanient pahadnieńnia praduhledžvaje rekanstrukcyju 12 mastoŭ na respublikanskich aŭtadarohach ź finansavańniem u pamiery 126 młn jeŭra. Čakajecca, što rekanstrukcyju mohuć pačać užo ŭ 2020 hodzie paśla praviadzieńnia nieabchodnych pracedur.
Druhi tranš u pamiery 133 młn jeŭra pryznačany dla madernizacyi trasy M3, jakaja złučaje Minsk ź Viciebskam. Hetyja srodki buduć nakiravany na rekanstrukcyju 47-kiłamietrovaha ŭčastka trasy.
Daŭžynia darožnaj sietki Biełarusi składaje kala 87 tys. km, uklučajučy 2-i i 9-y mižnarodnyja transpartnyja kalidory, jakija złučajuć krainy - udzielnicy ES z Rasijaj, Siaredniaj Azijaj i Kitajem. Jany taksama złučajuć krainy Bałtyi z Čornym moram.