Pieramovy skončylisia — Łukašenka źjechaŭ biez zajavaŭ dla presy
07.12.2019 / 21:04
Fota: BiełTA.
Bolš jak piacihadzinnyja pieramovy delehacyj Biełarusi i Rasii ŭ Sočy skončylisia. Prezidenty padaravali adzin adnamu padarunki, piša «Puł Pieršaha».
Łukašenka źjechaŭ z Bačarova Ručaja biez zajavaŭ dla presy.
Pra vyniki pieramovaŭ žurnalistam maje chutka raskazać kiraŭnik Minekanomraźvićcia RF Maksim Areškin, dadaje «Puł N3». Jon niejki čas marudziŭ, bo «jaho vyklikaŭ načalnik» (treba dumać, Pucin).
Spravazdača Maksima Areškina žurnalistam pra siońniašnija šmathadzinnyja biełaruska-rasijskija pieramovy zaniała niedzie chvilinu.
«Plonna papracavali pa cełym šerahu kirunkaŭ - pa sielskaj haspadarcy, pa suviazi, pa mytni, pa rehulavańni naftavaha rynku dasiahnuli vielmi surjoznaha prahresu, - skazaŭ jon. - Navat pa pytańni nafty i hazu pazicyi byli vielmi surjozna zbližanyja. Atrymany ŭkazańni. Pačynajem prapracoŭvać. Na 20 śniežnia ŭ prezidentaŭ pryznačana sustreča ŭ Pieciarburhu. Budziem im dakładvać», — skazaŭ Areškin.
Z hetaj zajavy vynikaje, što padpisańnie 8 śniežnia ŭ Maskvie dakumientaŭ ab «pahłyblenaj intehracyi» admianiłasia.
Pieramovy doŭžylisia piać z pałovaj hadzin.
Paśla «ahulnaj» dźviuchhadzinnaj častki sustrečy Łukašenka i Pucin praciahnuli hutarku sam-nasam. Delehacyi ž na čale z Rumasam i Miadźviedzievym praciahnuli sustreču ŭ farmacie rabočaha abiedu. Paśla abiedu kiraŭniki dziaržaŭ viarnulisia da abmierkavańnia pytańniaŭ za ahulny stoł.