MUS nie znajšło parušeńniaŭ sanitarnych normaŭ u izalatary na Akreścina
Zvarot jurysta «Viasny» byŭ razhledžany Departamientam finansaŭ i tyłu MUS, ale parušeńniaŭ sanitarnych normaŭ u CIP nie znajšli, piša sajt «Viasny».
05.01.2020 / 15:42
Juryst Pravaabarončaha centra «Viasna» Pavieł Sapiełka źviarnuŭsia ŭ Ministerstva ŭnutranych spraŭ pa fakcie parušeńnia sanitarnych normaŭ i praviłaŭ pry ŭtrymańni pad aryštam u Centry izalacyi pravaparušalnikaŭ aktyvista kampanii Legalize Belarus Piatra Markiełava.
Pravaabaronca na praciahu mnohich hadoŭ pravodzić manitorynh situacyi z zabieśpiačeńniem pravoŭ čałavieka ŭ miescach niesvabody i ŭ apošnija hady nieadnarazova atrymlivaŭ źviestki pra toje, što aktyvisty, aryštavanyja za adstojvańnie svaich pravoŭ i svabodaŭ, utrymlivajucca ŭ CIP sumiesna z asobami, jakija chvarejuć na piedykuloz i nie prajšli adpaviednuju sanitarnuju apracoŭku.
Sa ŚMI Paŭłu Sapiełku stała viadoma ab tym, što Piotr Markiełaŭ utrymlivaŭsia pad aryštam z 9 śniežnia 2019 hoda sumiesna z asobami, jakija pakutujuć na piedykuloz.
«Umovy ŭ kamiery žudasnyja: razam ź Piatrom siadziać dva bamžy, staić taki smurod, što niama čym dychać, vošy», — tak apisvaŭ umovy ŭtrymańnia ŭ Centry izalacyi pravaparušalnikaŭ adzin z sukamiernikaŭ aktyvista.
Markiełaŭ sprabavaŭ źviarnucca z hetym pytańniem da administracyi izalatara, ale nichto na jaho skarhi nie adreahavaŭ.
Juryst Pavieł Sapiełka adznačaje, pry dastaŭleńni ŭ miescy adbyćcia pakarańnia administracyjna aryštavanyja pavinny być ahledžanyja miedrabotnikam, a pry jaho adsutnaści ŭ štacie - apytanyja načalnikam abo dziažurnym pra stan zdaroŭja ŭ metach:
- ustanaŭleńnia asobaŭ, jakija majuć patrebu ŭ akazańni chutkaj miedycynskaj dapamohi;
- vyjaŭleńnia asobaŭ z zachvorvańniami, jakija patrabujuć stałaha pryjomu lekavych srodkaŭ;
- vyjaŭleńnia asobaŭ z prykmietami infiekcyjnych zachvorvańniaŭ, karosty, piedykulozu, cialesnych paškodžańniaŭ.
Administracyjna aryštavanyja, dastaŭlenyja ŭ miescy adbyćcia aryštu, prachodziać sanitarnuju apracoŭku. U dalejšym sanitarnaja apracoŭka pravodzicca nie radziej adnaho razu ŭ tydzień i ŭklučaje myćcio ŭ łaźni (dušavoj) z abaviazkovaj źmienaj paścielnaj bializny, dezynfiekcyju asabistaha adzieńnia i paścielnych rečaŭ u dezynfiekcyjnaj kamiery.
Pry vyjaŭleńni infiekcyjnaha zachvorvańnia, karosty, piedykulozu ŭ administratyŭna aryštavanaha padčas jaho ŭtrymańnia pad aryštam jon źmiaščajecca ŭ asobnuju kamieru, a miedrabotnik abaviazany paviedamić pra heta ŭ centr hihijeny i epidemijałohii i ŭ dalejšym ažyćciaŭlać adpaviednyja mierapryjemstvy pad kantrolem hetaha centra.
«Miarkuju, što nazvanych mierapryjemstvaŭ praviedziena nie było, albo praviedzienyja mierapryjemstvy byli niedastatkovymi i nie prynieśli naležnaha efiektu, a takim čynam, administracyja CIP nie raspačała ŭsich nieabchodnych i abaviazkovych sanitarnych mieraŭ», — adznačaŭ u svaim zvarocie pravaabaronca.
Pavieł Sapiełka prasiŭ MUS pravieści pravierku źviestak ab sanitarnych umovach u CIP, u tym liku apytać administracyjna aryštavanaha Piatra Markiełava, vyvučyć sutačnyja płany pakamiernaha raźmiaščeńnia aryštavanych i zatrymanych hramadzianaŭ, ahledzieć tych asobaŭ, jakija ŭtrymlivalisia ŭ adnoj kamiery z aktyvistam.
Adnak zvarot jurysta «Viasny» byŭ razhledžany Departamientam finansaŭ i tyłu MUS. Tak, načalnik hetaha padraździaleńnia Viktar Dubaviec u svaim adkazie ŭkazvaje, što pa pytańniach, vykładzienych u zvarocie, u tym liku ŭtrymańnia Piatra Markiełava, 23 śniežnia 2019 hoda byŭ praviedzieny sanitarna-epidemijałahičny manitorynh u CIP.
«Fakty parušeńnia patrabavańniaŭ sanitarna-epidemijałahičnaha zakanadaŭstva, techničnych narmatyŭnych pravavych aktaŭ, narmatyŭnych aktaŭ Ministerstva ŭnutranych spraŭ Respubliki Biełaruś, jakija rehulujuć funkcyjanavańnie CIP HUUS Minharvykankama, nazvanyja ŭ zvarocie, na momant praviadzieńnia manitorynhu nie znajšli svajho paćviardžeńnia», — adznačajecca ŭ adkazie Departamienta finansaŭ i tyłu.
23 śniežnia Piotr Markiełaŭ vyjšaŭ na volu paśla 14 sutak aryštu za patrabavańnie pieraličyć hałasy na vybarčym učastku, na jakim jon byŭ u jakaści davieranaj asoby kandydata ŭ deputaty Stasa Šaška. Aktyvista abvinavacili ŭ parušeńni dvuch artykułaŭ Kodeksa ab administracyjnych pravaparušeńniach: 17.1 (drobnaje chulihanstva) i 23.4 (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni joj słužbovych paŭnamoctvaŭ).