Неабыякавыя кіроўцы ў Мінску затрымалі неадэкватнага вадзіцеля буса і трымалі да прыезду ДАІ ВІДЭА
13.01.2020 / 16:34
Здарэнне адбылося вечарам у нядзелю на Партызанскім праспекце. Увагу кіроўцаў прыцягнуў грузавы мікрааўтобус «Мэрсэдэс», кіроўца якога сваёй яздой ствараў рэальную небяспеку для астатніх удзельнікаў дарожнага руху, паведамляе прэс-служба МУС.
Кіроўцы «Пежо» і «Форд», што праязджалі міма, спынілі белы грузавік. За рулём знаходзіўся 38-гадовы мужчына з бачнымі прыкметамі алкагольнага ап'янення. Ён супраціўляўся і спрабаваў збегчы, але мужчыны яго трымалі да прыбыцця супрацоўнікаў ДАІ.
Ад праходжання медыцынскага агляду кіроўца «Мэрсэдэса» адмовіўся. У дачыненні да яго складзены адміністрацыйныя пратаколы, у тым ліку і за стварэнне аварыйнай абстаноўкі.