Jak šukać pracu ŭ 44 hady
21.02.2020 / 12:14
Zhubiŭ pracu. Uładalnik sietki IT-kaledžaŭ nie zrazumieŭ, navošta jamu źniešnija suviazi, publicity, praca sa ŚMI, imidž i voś heta voś usio. Nu, byvaje. Raźvitalisia pa-dobramu, ale biez parašutaŭ, załatych i srebranych. I voś tut pytańnie: jak šukać pracu ŭ 44 hady, kali ty za svaje 26 hadoŭ karjery bolš za dva tydni ŭ pošukach pracy nivodnaha razu nie byŭ? Nie, reziume, naturalna, hatovyja, i akaŭnty na sajtach pošuku pracy jość. Ale jość prablemy. Voś jany. Svaim dośviedam na sajcie «Biełhaziety» padzialiŭsia Źmicier Dryhajła.
1. Pieravažnaja bolšaść pracadaŭcaŭ zaprašaje hatovych śpiecyjalistaŭ, jakija mohuć dadać value (karyści) tut i ciapier. Tamu admysłova paznačajuć u vakansijach «nie student», kali sprava nie jdzie pra admysłovy raździeł sajtaŭ «start karjery» z adpaviednymi miesiačnymi zarobkami ŭ BYN 200—250. A taksama balšynia kampanijaŭ pišuć abmiežavańni pa ŭzroście — «da 35 hadoŭ». Čamu? Pracadaŭcy dy ich HR ličać, što paśla 40 hadoŭ padaje pracazdolnaść supracoŭnika, jamu ŭsio bolš składana zasvojvać novyja viedy i technałohii, adaptavacca ŭ novym kalektyvie, adsoŭvajecca ŭvaha na siamju i dziaciej, paharšajecca stan zdaroŭja. Heta, miž inšym, taksama byvaje. Chacia daloka nie zaŭsiody. I jość kontrarhumienty. Ale hetym nienapisanym praviłam kirujucca ŭ kampanijach. Ci heta aznačaje, što mnie ŭžo hadoŭ ź piać tamu treba było pajści na piensiju? Tam, dzie sprava idzie pra vakansii top-mieniedžaraŭ, hetaha abmiežavańnia niama, ale i vakansijaŭ takich vobmal. Darečy, admova ŭ pryniaćci supracoŭnika na pracu pa ŭzroście zabaronienaja zakanadaŭča, ale ŭ realnym žyćci što naŭprost u apisańni vakansii, što ŭ papiaredniaj ankiecie, što ŭ telefonnaj razmovie praz prostaje pytańnie hety čyńnik spracoŭvaje nie na karyść taho, chto šukaje pracu.
2. Darečy, pra papiarednija ankiety. Siurpryz: anichto ciapier adrazu nie zaprašaje na intervju. Spačatku, navat kali vy padychodzicie na vakansiju pa pieršasnych prykmietach, vas prymusiać napisać matyvacyjny list, vykanać testavaje zadańnie, prajści anłajn-apytańnie j testy na źniešnich admysłovych veb-resursach (akaŭnty na jakich kaštujuć niatanna). Tamu da hetaha etapu (razmova z patencyjnym pracadaŭcam) zaraz nie dachodzić 90% šukalnikaŭ pracy, im nie dajuć šancu. Mnie, darečy, taksama nie daviałosia, choć ahułam za miesiac spatrebiłasia vydzielić paŭnavartasny pracoŭny tydzień na prachodžańnie raznastajnych internet-pieraškodaŭ.
3. Samaje istotnaje: źmianiŭsia miechanizm pošuku supracoŭnikaŭ u internecie. Kadraviki nie čytajuć vašaje CV, jany zabivajuć pošuk pa klučavych słovach, naprykład «prodažy», «praca z klijentami», «restaran», digital marketing, «chimičnaja vytvorčaść», SAP, 1C, Python i h.d. A potym pa dyjahanali hladziać na dva apošnija miescy pracy patencyjnaha šukalnika, a taksama na jaho finansavyja apietyty. Kali relevantny dośvied byŭ paznačany ŭ trecim zhary miescy pracy, ci nie byŭ paznačany žadany pamier zarobku, ci HR paprostu byŭ nie ŭ humory, to pra vas anichto ŭ hetaj kampanii nie daviedajecca, a reziume vašaje kinuć u topku. Bo pošuk kandydata — heta praces, na rynku niebahata kampanijaŭ, što płaciać HR-śpiecyjalistu za vynik, pahatoŭ, za ŭzrovień novaha supracoŭnika pa skančeńni jaho vyprabavaŭčaha terminu. Čaściej kadravik atrymlivaje zarobak za praces, za pastaŭku pramysłovaj kolkaści kandydataŭ, za mahčymaść pryvieści ŭ ofis jak najbolš pretendentaŭ. Tak, heta tracić kaštoŭny čas kiraŭnika j psuje jaho nastroj. Tamu i źjavilisia hetyja šmatlikija pre-testy, kab choć niejak racyjanalizavać praces. Prablema tolki, što časta tyja testy taksama nichto nie čytaje.
Dyk što rabić, kali vy zhubili pracu, jak jaje šukać? Kraina ŭvachodzić u hady recesii j źbiadnieńnia. Cełyja haliny vytvorčaści znachodziacca pad pytańniem dalejšaha isnavańnia. Buduć skaračeńni. U Rasiei adbyvajucca tyja ž pracesy, ale rynak pracy šyrejšy (u tym liku ŭ prostym sensie), hrošaj bolš. Tamu tam adnačasova z padvyšeńniem piensijnaha ŭzrostu, skažam, zapuścili admysłovyja prahramy pa pierakvalifikacyi dy pracaŭładkavańni asobaŭ pieradpiensijnaha vieku, zabaranili zvalniać ich za dva hady da nastupleńnia piensijnaha ŭzrostu, kali tolki nie pa artykule za prahuł ci pjanku i h.d. U nas ža ŭsie, chto ad 45 j da 65 — pad pahrozaj «zvalnieńnia nazaŭždy», kali možna sprabavać uładkavacca dvornikam, achoŭnikam, kurjeram, pračkaj, hruzčykam, roznapracoŭnym, kaścialanšaj… Na «studenckija» BYN 200—250. Zhodna sa statystykaj, stałyja ludzi šukajuć pracu daŭžej, čym maładyja. Tym, kamu plus-minus 50, admaŭlajuć utraja čaściej pry adbory na vakansiju. Pry hetym u krainach «staroj Jeŭropy» ŭsio dakładna naadvarot: tam pieravahu addaduć čałavieku z dośviedam, jaki ŭžo maje siamju, dziaciej i «historyju chvaroby». Jon budzie našmat bolš stabilna pracavać, nie stanie mitusicca, šukać novuju pracu z patencyjna vyšejšym na 100 rubloŭ zarobkam, jon, jak praviła, maje vyšejšy sacyjalny intelekt.
Ale na spravie ludzi pad 50 šukajuć novuju pracu ŭ siarednim hod. Kudy padacca? Kadravyja ahiencyi, biržy pracy, sacyjalnyja setki, networking (ci znajomyja, to-bok «sarafannaje radyjo»), sajty kampanijaŭ, što padabajucca, jakija čaściakom pišuć naŭprost u siabie na sajcie svaje vakansii dy elektronnyja adrasy z telefonami. Heta — mahčymaść abminuć filtr kadravikoŭ ci źnizić jaho ŭpłyŭ. Kali praz sajt vakansijaŭ — dyk napišycie jaskravy matyvacyjny list na try-čatyry skazy, maŭlaŭ, kampanija mnie padabajecca, ja joj padychodžu i chaču ŭ joj pracavać, nie vahajusia, maju siamju, žyćciovy i pracoŭny dośvied, fajna vyhladaju i stylova apranajusia. A kali voźmiecie, dyk dam rady ŭ takich i hetkich pytańniach.
Praź miesiac pošuku pracy praz sajt vakansijaŭ mianie zaprasili na pieršaje sumoŭje. U kampaniju sietkavaha markietynhu, što realizuje kitajskija BADy j masažory Tiens i chavajecca za farmuloŭkaj «pradstaŭnictva bujnoj mižnarodnaj kampanii». Zaprasili mieniedžaram pa raspaŭsiudzie, što było schavana za farmuloŭkaj «administratyŭny kiraŭnik»… Pracu ja znajšoŭ. Ale nie hetuju. I nie praz sajty pošuku pracy. Heta nie aznačaje, što nie treba trymać tam infarmacyju pra siabie: jość vypadki, kali ŭsio ŭdajecca i ludzi znachodziać pracu mienavita tak, z vulicy, «u chałodnuju». Ale tak byvaje, na žal, radziej, čym praz znajomych.
Treba jašče dadać, što kali stałamu čałavieku šukać pracu praz sajty vakansijaŭ, to nieabchodna zrabić niekalki varyjantaŭ reziume, u adpaviednaści z halinami, u jakich čałaviek maje dośvied: skažam, asobnaje — pad prodažy, asobnaje — pad PR, asobnaje — pad žurnalistyku, asobnaje — pad navučańnie j vykładańnie, i asobnaje — pad apieracyjanaje kiraŭnictva prajektami. Heta patrebna dla taho, kab kadraviki, što, pamiatajma, nie prahladajuć reziume całkam, pabačyli tolki toje, što im patrebna.
Hałoŭnaje — nie zdavaca j hrukacca. Pakul nie voźmuć. Bo ŭ našaj ekanamičnaj situacyi, pa-mojmu, lepiej pracavać, čym nie pracavać. A to adna z maich znajomych nie pracuje ŭžo 20 hadoŭ, siedziačy na šyi ŭ byłoha (!) muža, i ŭsim znajomym surjozna zajaŭlaje: «Zatoje ja maju pačućcio svabody». Ad pracy — tak. A va ŭsim astatnim?