Расійская істэрыка пасля дамовы «Украіна — Еўрасаюз»
Прэм’ер‑міністр Расіі Ўладзімір Пуцін на прэс‑канферэнцыі ў Сочы заявіў, што Масква гатовая перагледзець прынцып адносінаў з Еўрасаюзам.
23.03.2009 / 20:46
Прэм’ер‑міністр Расіі Ўладзімір Пуцін на прэс‑канферэнцыі ў Сочы заявіў, што Масква гатовая перагледзець прынцып адносінаў з Еўрасаюзам.Гэта станецца ў тым выпадку, калі Брусель будзе надалей ігнараваць інтарэсы Расіі. «Вельмі хочацца, каб да гэтага не дайшло», — сказаў У.Пуцін.
Такім чынам расійскае кіраўніцтва адрэагавала на падпісаную ў Бруселі дамову між Украінай і Еўрасаюзам па мадэрнізацыі ўкраінскай газатранспартнай сістэмы.«Сумесная заява адназначна фіксуе, што газатранспартная сістэма Ўкраіны з’яўляецца і будзе з’яўляцца дзяржаўнай уласнасцю», — заявіла прэм’ер‑міністр Украіны Юлія Цімашэнка.
«Мне здаецца, што гэты дакумент з’яўляецца, як мінімум, непрадуманым і непрафесіянальным», — адказаў на гэта У.Пуцін.
МЗС Расіі таксама адрэагавала на дамову, заявіўшы, што ў выніку можа падаражаць кошт газу для ўкраінскіх і заходніх спажыўцоў.